ढाकोरी ग्रामपंचायत मध्ये युवा पर्व.. २५ वर्षाचे अजय पांडुरंग कवरासे यांच्या हातात सत्ता..

वणी: तालुक्यातील ढाकोरी ग्रामपंचायत प्रस्थापितांचा गड समजण्यात येत होता. मात्र युवकांनी आणि या स्थानिक कार्यकर्त्यांनी दशरथ मांडवकर,मनोहर ठाकरेआणि तुळशिराम मालेकार, दिवाकर कवरासे, मंगेश भगत, मारोती निमकर, दिवाकर काळे यांच्या नेतृत्वाखाली मुसक्या आवळायचा चंग बांधला आणि ग्रामविकास आघाडी स्थापन करून एकतेचे दर्शन घडविले. मागील सलग १० वर्षापासून अभेद किल्ला मानल्या जाणाऱ्या गडाला सुरूंग लावून ढाकोरी ग्रामपंचायतवर ग्रामविकास आघाडीचा झेंडा फडकविला आहे.

निवडणूकित ग्रामविकास आघाडीचे अजय पाडुरंग कवरासे, सौ.वंदना हनुमंते, सौ.रुपाली खाडे, सौ. शारदा शेंडे, असे ४ सदस्य निवडून आलेत. ७ सदस्य ग्रामपंचात असल्यामुळे साम दाम दंड भेद वापरून सरपंच, उपसरपंच पदाची निवडणूक रंगतदार करण्याचा साम, दाम, येन केन प्रकारे सत्ता बडकविण्याचे प्रयत्नही पडद्या आडून सुरू झालेत. आता नेमके काय घडेल अशी उत्सुकता जनतेत निर्माण झाली. मात्र सरपंच, उपसरपंच पदासाठी घेण्यात आलेल्या निवडणूकीत ग्रामविकास आघाडीने एकतेची मोट बांधून विरोधकांचे सर्व मनसुबे उधळून लावले आणि जोरदार दनका दिला. सरपंचपद हे सर्वसाधारण पुरुष राखीव असल्यामुळे ग्रामविकास चे अजय पांडुरंग कवरासे उपसरपंच सौ. शारदा अनंता शेंडे यांची अविरोध निवड करण्यात आली.

ढाकोरी ग्रामपंचायतच्या नवनियुक्त सरपंच, उपसरपंच आणि सर्व सदस्यांचे परिसरातील नेत्यांनी, स्थानिक जनतेनी अभिनंदन केले आहे. तर निवड झालेल्या सरपंच, उपसरपंच आणि सदस्यांनी सर्वांचे आभार मानले आहेत. तसेच जनतेच्या विश्वासाला पात्र राहून गावात विकास कामांना गती देण्याचा संकल्प केला आहे.