चंद्रपूर येथे झालेल्या बालनाट्य स्पर्धेत वणीच्या चमुला द्वितीय पारितोषिक.

वणी:- वणी येथील बालकलावंतांनी चंद्रपूर येथे झालेल्या महाराष्ट्र कामगार कल्याण मंडळ  बालनाट्य स्पर्धेत द्वितीय क्रमांकाचे पारितोषिक प्राप्त केले आहे. "पुस्तकाच्या पानातून" हा नाट्य प्रयोग चंद्रपूर येथील ललित कला भवन, बंगाली कॅम्प, येथे १७ डिसेंबर रोजी सादर केला.

सागर झेप संस्थेच्या माध्यमातून वणी शहरांमध्ये विविध नाट्य, नृत्य, संगीत, सामाजिक सांस्कृतिक कार्य करण्यात अग्रेसर आहे. त्याचप्रमाणे वणी शहरांमध्ये नाट्यकला जिवंत ठेवण्याचे कार्य सागर मुने करत असून नवनवीन कलावंताना व्यासपीठ देण्याचं कार्य करते.  यापूर्वी सुद्धा महिला नाटक, बालनाट्य, राज्य नाट्य स्पर्धेमध्ये नवनवीन कलावंतांना अभिनय शिकवून स्पर्धेत नेतात आणि त्यांना पारितोषिक प्राप्त व्हावे असे मार्गदर्शन करतात. यावर्षी सागर मुने यांच्या मार्गदर्शनामध्ये चंद्रपूर येथे झालेल्या बालनाट्य  स्पर्धेत सहभाग घेऊन द्वितीय क्रमांकाचे पारितोषिक प्राप्त करून उत्कृष्ट दिग्दर्शक व उत्कृष्ट अभिनय चे पारितोषिक मिळवून दिले आहे. १७ डिसें. ला बालनाट्य स्पर्धा संपन्न झाली असून ऍड.गौरव खोंड लिखित पुस्तकाच्या पानातून हे बालनाट्य सादर करण्यात आले. यामध्ये उत्कृष्ट दिग्दर्शक तिसरा क्रमांक मंगेश गोहोकार, उत्कृष्ट अभिनय तेजेश्वर खुसपुरे व वसुंधरा नघाटे यांना तृतीय क्रमांक प्राप्त झाला. माही खुसपुरे, तन्मय कंदलवार, स्मित राऊत, रोहिणी नघाटे, हिमांशू गोडे, सोनाक्षी खुसपुरे यांनी सुंदर अभिनय सादर केला.

यावेळी आकाश महाडुळे, सुरेश चिकटे, यासह पालकांनी बाल नाट्य यशस्वी होण्यासाठी विशेष सहकार्य केले. सर्वत्र बालकलावंत व सहकाऱ्यांचे कौतुक करण्यात येत आहे