झरी तालुक्यात पीकविमा कंपनी प्रतिनिधी कडून शेतकऱ्यांची लूट

एक पीक २००रुपये तर सातबाऱ्याचा १००० रु भाव

झरी :निसर्गाच्या लहरीपणामुळे झरी तालुक्यात शेतपिकांचे मोठे नुकसान झाले असून, त्यामुळे शेतकरी हतबल झालेला आहे.खरीप हंगामात विमा भरला असता नुकसान झाल्याचा क्लेम शेतकऱ्यांनी  केला. अशा परिस्थितीत पंचनामा करण्यासाठी आलेल्या विमा कंपन्यांच्या प्रतिनिधींनी बाजार मांडला असून, नुकसानग्रस्त पिकांचे पंचनामे करण्यासाठी प्रती पीक २०० तर प्रति सातबारा १००० रुपयांचा भावच ठरविला आहे. त्यामुळे यातून शेतकऱ्यांची प्रचंड लूट सुरू आहे.दरम्यान हा सर्व प्रकार घडत असल्याने शेतकऱ्यांमध्ये नाराजी निर्माण झाली आहे. झरी तालुक्यात अतिवृष्टी व सततच्या पावसामुळे शेतकऱ्यांच्या शेतीपिकांचे मोठे नुकसान झाले आहे. ज्या शेतकऱ्यांनी पीकविमा भरला व ज्यांनी ७२ तासांत विमा कंपनीकडे तक्रारी केल्या, अशाच शेतकऱ्यांच्या पिकांचे पंचनामे करण्याचे काम सध्या सुरू आहे. त्यासाठी विमा कंपनीमार्फत नेमण्यात आलेले प्रतिनिधी गावोगावी जाऊन शेतकऱ्यांच्या शेतातील पिकांचे पंचनामे करत आहेत.
मात्र, नुकसानीचा आर्थिक गैरफायदा उचलत विमा कंपनीचे हे प्रतिनिधी प्रती पीक व प्रती गट क्रमांक दोनशे ते हजार रुपयांपर्यंत रक्कम उकळत आहेत.जास्त पैसे दिले तर जास्त हेक्टर नुकसान दाखवू असे प्रतिनिधी सांगून पैसे उकळत आहेत.एका शेतकऱ्याने चार ते पाच पिके लावली आहेत.तसेच एका शेतकऱ्याच्या कुटुंबियांचे अनेक खाते आहेत. अडकोली येथील एका शेतकऱ्याला ४ हजार मागणी केली असता संतप्त शेतकऱ्याने त्या प्रतिनिधीला बियर बार च्या समोर चांगलाच चोप दिल्याचे माहिती मिळाली.अशा शेतकऱ्यांनी हजारो रुपये मोजले तरच विमा कंपनीचे प्रतिनिधी पंचनामे करतात.तरी याकडे कृषी विभागाने तातडीने लक्ष देण्याची गरज आहेत.