वरोरा टप्प्यावरुन वणीचे प्रवासी बसमध्ये बसविण्याची मागणी.

वणी :- वरोरा मार्गाने महाराष्ट्र राज्य परिवहन महामंडळाच्या नागपुर ते चंद्रपुर व वणी करीता बसेस धावत असतात. परंतू चंद्रपुर येथे जाणारी बस वरोरा बस स्थानकावर न जाता सरळ चंद्रपुरच्या दिशेने निघून जाते. त्यामुळे चंद्रपुर बसमध्ये आलेले वणीचे प्रवासी नागपुर रोडवरील वरोरा टप्प्यावर उतरतात. मात्र नागपुर व चंद्रपुर वरुन वणीला जाणा-या महामंडळाच्या बसेस वरोरा टप्प्यावरुन वणीच्या प्रवाशांना बसमध्ये बसण्याची परवानगी देत नाही. त्यामुळे सदर ठिकाणाहुन वणीला जाणा-या प्रवाशांना आटोद्वारे अव्वाच्या सव्वा पैसे मोजून नाईलाजाने बस स्थानकावर यावे लागते किंवा एखाद्या खाजगी बसने जादाचे पैसे देऊन वणीला यावे लागते. वेळप्रसंगी काही प्रवाशांना रेल्वे क्रासिंग ओलांडून पायदळ वरोरा बस स्थानक गाठावे लागते. याक्षणी जीव धोक्यात घालून जावे लागते. काही वर्षांपूर्वी अशीच एक जिवघेणी घटना घडून वरोरा बस स्थानक गाठतांना वणी येथील नागरीकाला रेल्वेने कटून जिव गमवावा लागला होता. वरोरा टप्प्यावरुन बस स्थानक जवळपास अंदाजे ४ ते ५ कि.मी. अंतरावर असल्यामुळे प्रवाशांना बस स्थानक गाठण्यात चांगलीच कसरत करावी लागत आहे.

       त्यामुळे नागपुर व चंद्रपुरहून वणीकडे येणा-या जाणा-या प्रवाशांना वरोरा टप्प्यावरुन किंवा टप्प्यापर्यंत महामंडळाच्या बसमध्ये बसण्याची परवानगी देण्यांत यावी. याकरीता वरोरा टप्प्याला जूने बस स्थानक घोषीत करावे व तेथून किंवा तेथपर्यंत आवश्यक ते तिकिट आकारावे. जूने बस स्थानक घोषीत करण्यास अडचण येत असल्यास आवश्यक त्या उपाययोजना करुन प्रवाशांची होणारी गैरसोय टाळावी अशी मागणी प्रशांत गाडगे, दिपक गोहणे, प्रविण उपरे, मंगल तेलंग, शशिकांत नक्षीणे, अविनाश नक्षीणे, बंडू गणवीर, आकाश बोरकर, गौरव जवादे, संदीप दुपारे यांचेसह वणीतील अनेक नागरीकांनी विभागीय नियंत्रक, नागपुर, चंद्रपुर व यवतमाळ यांचेकडे निवेदनाद्वारे केली आहे.