रंगकाम करताना खाली पडून पन्नास वर्षीय इसमाचा मृत्यू.

वणी:- कलरचे काम करीत असताना तिसऱ्या मजल्यावरून खाली पडल्याने एका मजुराचा मृत्यू झाल्याची दुःखदायक घटना आज दुपारी एक वाजताच्या दरम्यान उघडकीस आली.

शहरातील रंगारीपुरा येथील रहिवासी बंडू तुकाराम खोब्रागडे वय ५० वर्ष असे मृतकाचे नाव आहे. ते कलरचे काम करीत होते.  ते आकाश उईके या ठेकेदाराकडे कामावर होते, आज दिनांक २५ जुलै रोजी सकाळी ते छोरिया लेआऊट मधिल विनायक अपार्टमेंट मध्ये तिसऱ्या मजल्यावर कलर मारण्याचे काम करीत असताना  बिल्डिंग वरून खाली पडल्याने त्यांना त्यांच्या सहकाऱ्यांनी तात्काळ ग्रामीण रुग्णालय वणी येथे दाखल केले असता डॉक्टरांनी तपासून त्याला मृत घोषित केले.

शवविच्छेदना नंतर मृतदेह नातेवाईकांच्या स्वाधीन करण्यात आला. बंडू यांच्या पश्चात पत्नी, एक मुलगा, एक मुलगी व बराच मोठा आप्तपरिवार आहे.

बंडू यांच्या मृत्यूमुळे परिसरात हळहळ व्यक्त केली जात आहे. घटनेचा पुढील तपास वणी पोलिस करीत आहेत.