अतिक्रमण धारकांची मुजोरी, नगर पालिका प्रशासनाची कमजोरी.

कोंडवाड्या समोरील काढण्यात आलेले अतिक्रमण जैसे थे.

वणी : वणी नगर पालिकेच्या मालकीचे असलेल्या शहरातील टुटी कमान चौका जवळील कोंडवाड्या समोर काही अतिक्रमण धारकांनी अतिक्रमण केल्यामुळे जनावरांचा बंदोबस्त करण्यासाठी अडचण निर्माण झाली आहे, परिणामी अतिक्रमण हटविण्याची मागणी कोंडवाडा अभिकर्ता यांनी एका पत्राद्वारे मुख्याधिकारी यांच्याकडे केली. परिणामी नगर पालिका प्रशासनाच्या वतीने दिनांक १२ जुलै रोजी कोंडवाडा समोरील अतिक्रमण काढण्यात आले होते. मात्र दुसऱ्याच दिवशी म्हणजे रविवारी सकाळी सदर अतिक्रमण धारकांने आपले भेल भंडार चे दुकान कोंडवाड्यासमोर आणुन लावले आहे. त्यामुळे आता जनावरांना कोंडवाड्यात टाकायचे कसे? असा प्रश्न उपस्थित झाला आहे. विशेष म्हणजे नगर पालिका प्रशासनाच्या वतीने काढण्यात आलेले अतिक्रमण पुन्हा दोन दिवसांत "जैसे थे" झाल्याने अतिक्रमण धारकाची मुजोरी तर नगर पालिका प्रशासनाची कमजोरी दिसून येत आहे!

सविस्तर वृत्त असे की, वणी शहरात मोकाट जनावरांनी धुमाकूळ घातला असून मुख्य रस्त्यावर बस्तान मांडले आहे. परिणामी रहदारीस अडथळा निर्माण झाला असून कोणतीही दुर्घटना होण्याची शक्यता आहे. या मोकाट जनावरांचा बंदोबस्त करण्यासाठी नगर पालिकेच्या मालकीचा शहरातील टुटी कमान चौक जवळ कोंडवाडा आहे. हा कोंडवाडा शहरातील आणि परिसरातील मोकाट जनावरांचा बंदोबस्त करण्यासाठी उपयोगी आहे. मात्र काही दिवसांपासून हा कोंडवाडा अतिक्रमणाच्या विळख्यात सापडलेला आहे. सदर कोंडवाडा समोर भेल सेंटर व चॉय कॅटीन वाल्यांनी अतिक्रमण केल्यामुळे  शहरातील मोकाट जनावरांचा बंदोबस्त करण्यासाठी अडचण निर्माण झाली आहे. त्यामुळे सदर अतिक्रमण हटविण्याची मागणी कोंडवाडा अभिकर्ता यांनी मुख्याधिकारी यांच्याकडे केली आहे. विशेष म्हणजे २०२२  म्हणजेच चार वर्षांपासून कोंडवाडा समोरील अतिक्रमण हटविण्यासाठी पत्रव्यवहार केल्यानंतर शुक्रवारी दिनांक १२ जुलै ला सकाळी सदर अतिक्रमण काढण्यात आले मात्र दोन दिवसांत अतिक्रमण जैसे थे झाल्याने आता जनावरांचा बंदोबस्त करायचा तरी कसा असा प्रश्न कोंडवाडा अभिकर्ता यांच्या समोर उपस्थित झाला आहे. विशेष म्हणजे नगर पालिका प्रशासनाच्या वतीने काढण्यात आलेले अतिक्रमण पुन्हा जैसे थे झाल्याने आश्चर्य व्यक्त केले जात आहे.