*उपमुख्यमंत्र्याचा तोतया पी.ए. चंद्रपूर येथून गजाआड* *महागाव येथील नायब तहसीलदाराला मागितली होती खंडणी*

*उपमुख्यमंत्र्याचा तोतया पी.ए. चंद्रपूर येथून गजाआड*

महागाव येथील नायब तहसीलदाराला मागितली होती खंडणी

✍️रमेश तांबे

वणी तालुका प्रतिनिधी

 वणी:- हॅलो… मी उप मुख्यमंत्री साहेब यांचा खाजगी सचिव पाटणकर बोलत आहे. तुमच्या विरुध्द विधानसभा प्रश्न आहे. विधानसभेत प्रश्न न लावता परस्पर निपटारा करायचा असेल तर, मा. उप मुख्यमंत्री साहेब यांनी ठेवलेल्या कार्यक्रमाकरिता 71 हजार रुपये देणगी पाठवा. पैसे पाठविण्यासाठी मी गुगल पे नंबर पाठवीत आहे.असा फोन 1 जुलै रोजी महागाव तहसील कार्यालयात नायब तहसीलदार गोदाजी मुंगा राठोड यांना आला. आणि आश्चर्य म्हणजे नायब तहसीलदार राठोड यांनी फोन करणाऱ्या व्यक्तीने पाठविलेल्या गुगल पे नंबरवर 2 हजार रुपये पाठविले ही. मात्र त्यानंतर त्यांना शंका आली म्हणून त्यांनी महागाव पोलीस ठाण्यात जाऊन तक्रार नोंदवली. हाय प्रोफाईल विषय असल्यामुळे जिल्हा पोलिस अधीक्षक यांना तात्काळ या घटनेबाबत कळविण्यात आले.जिल्हा पोलीस अधीक्षक डॉ पवन बनसोड यांच्या आदेशाने त्याच रात्री वेगवेगळे पोलीस पथक निर्माण करुन अज्ञात आरोपीचा शोध घेणे कामी रवाना करण्यात आले. गोपनीय माहिती तसेच तांत्रिक पुराव्यावरुन आरोपी हा चंद्रपुर येथील असल्याची माहिती पोलिसांना मिळाली होती. माहितीवरुन पोलीस पथकाने प्रफुल उर्फ अनिल मधुकर चांदेकर (32) रा. वार्ड क्र. 03 पिपरी ता. कोरपना जि. चंद्रपुर यास ताब्यात घेवुन विचारपुस केली असता त्याने नमुद गुन्हा केल्याचे कबुल केले आहे.सदर आरोपी विरुध्द यापुर्वी सुध्दा फसवणूक केल्या बाबतचे कलम 420 तसेच बनावट दस्तऐवज तयार केल्या बाबत कलम 471, 46, 120 (ब) 34 भादवी, तसेच चेक बाउन्स केल्याबाबत कलम 138 सारखे गुन्हे दाखल आहे. तसेच आरोपी हा प्रतिष्ठित व्यक्ती, नेता यांच्या नावाचा वापर करुन लोकांची फसवणूक करत असल्याचे स्पष्ट झाले.सदर गुन्हा उघड करण्यासाठी जिल्हा पोलीस डॉ.पवन बनसोड, अपर पोलीस अधीक्षक पियुष जगताप, उमरखेडचे उ.वि.पोलीस अधिकारी हनुमंतराव गायकवाड, वणीचे उ.वि.पोलीस अधिकारी "पोलीस अधिकारी गणेश किंद्रे, महागावचे ठाणेदार पो.नि.धनराज निळे यांचे मार्गदर्शनात API अमोल पुरी सायबर सेल यवतमाळ, शिरपूरचे ठाणेदार API माधव शिंदे, PSI रावसाहेब बुधवंत, HC प्रशांत झोड, निलेश भुसे, महागाव पो. स्टे.चे PSI, सागर अन्नमवार, HC विलास व्यवहारे, NPC संतोष जाधव यांनी परिश्रम घेवुन 2 दिवसाचे आत आरोपीला अटक केली.