वणी तालुक्यातील बेलोरा गावात एक गाव एक गणपती आदर्श संकल्पना.

ह्या गावाने एक गांव एक उत्सवाच्या माध्यमातून जनतेसमोर एक आदर्श उभा केला आहे.

:- वणी तालुक्यातील सर्व समाज समावेशक असलेला व तालुक्याच्या आखरी टोकाला असलेल्या बेलोरा या गावात मागील काही वर्षांपासून एक गाव एक गणपती उत्सवाच्या माध्यमातून श्री.सिध्दिविनायक सार्वजनिक गणेश मंडळांनी जनतेसमोर आदर्श ठेवला आहे. तालुक्यात घरोघरी दीड, अडीच आणि पाच दिवसांचा तर सार्वजनिक गणेश मंडळामध्ये पाच, सात आणि अकरा दिवसांसाठी बाप्पांची स्थापना झाली. मात्र, एक गाव एक गणपती सारखी संकल्पना क्वचितचं ठिकाणी दिसून येते. अशीच एक गाव एक गणपतीची संकल्पना वणी तालुक्यातील बेलोरा गावानं गेल्या काही वर्षांपासून अविरतपणे सुरू ठेवली आहे.

बेलोरा या गावातील सर्व समाजाचे महिला, पुरुष व आबालवृद्ध एकत्र येऊन सार्वजनिक गौरी पुजन, गणेशोत्सव आनंदानी साजरे करतात. संपुर्ण गाव एकाच ठिकाणी येऊन गणपती उत्सव साजरा करतात व विसर्जन मिरवणूकिला संपूर्ण गाव सहभागी होऊन कोणताही तंटा, भांडण न होता मोठ्या उत्साहात मिरवणूक काढून गणपती बाप्पाचं विसर्जन करतात, विशेष म्हणजे या गावातील एक नागरिक एक वर्षी स्वखर्चाने गणपतीची मूर्ती मंडळाला भेट देत असून पुढील दोन वर्षांसाठी मुर्ती बुक झाली आहे. अशी परंपरा या बेलोरा गावात सुरू असून त्यामुळे हे गाव आदर्श गाव म्हणून ओळखले जात आहे.