आयुष्य हे सुंदर आहे त्याचा आस्वाद घ्या- माधव सरपटवार.

वणी:- गुरू पूजा हे आपल्या संस्कृतीचे वैशिष्ट आहे. गुरू ने दिलेली शिकवण आचरण्यात आणणे ही सर्वात मोठी गुरू दक्षिणा आहे. मनुष्याला मिळालेले आयुष्य हे अतिशय सुंदर आहे. त्याचा प्रत्येकांनी आस्वाद घ्यावा, असे प्रतिपादन संस्कार भारती तर्फे आयोजित गुरू पूजनाच्या कार्यक्रमात अध्यक्षस्थानावरून बोलतांना माधव सरपटवार यांनी केले.

    या कार्यक्रमात अतिथी म्हणून लोकमान्य टिळक महाविद्यालयाचे प्राध्यापक डॉ. गजानन अघळते, सूचना बंगाले व संस्कार भारतीच्या वणी शाखेच्या संयोजिका रजनी पोयाम या व्यासपीठावर उपस्थित होते.

    कार्यक्रमाची सुरुवात खरा तो एकची धर्म या सागर मुने यांनी गायिलेल्या गीताने झाली.   या गुरुपूजनाच्या कार्यक्रमात गजानन कासावार, नामदेव ससाणे, सूचना बंगाले, सागर मुने यांना  गुरू  मानून रजनी पोयाम, भारती सरपटवार, शैलेश अडपावार, नुपूर नृत्य कला अकादमीच्या नृत्य शिकणाऱ्या सर्व मुली व निखिल वाघाडे  यांनी त्यांचे पूजन करून गुरू दक्षिणा दिली.

   याप्रसंगी मुख्य वक्ते डॉ. अघळते यांनी गुरू चे महत्व विविध उदाहरणे देऊन स्पष्ट करीत प्रत्येक यशस्वी व्यक्तीच्या मागे तेवढाच सक्षम गुरू असतो असे सांगितले.

या कार्यक्रमाचे प्रस्ताविकातून या कार्यक्रमाचा उद्देश येथील संस्कार भारतीच्या संयोजिका रजनी पोयाम यांनी मांडले. सूत्रसंचालन सुनील ठाकरे यांनी केले. आभार प्रदर्शन अमित उपाध्ये यांनी केले. अर्पित मोहूर्ले,  सुमन डेकोरेशन चे संचालक संदीप आस्वले व जैताई देवस्थान चे विशेष सहकार्य लाभले.