शिवणी धोबे येथील झगळा घाटावर दोन महिन्यापासून सतत रेतीची अवैधरित्या तस्करी.

महसूल विभागासह पोलीस विभागाचेही दुर्लक्ष, रेती माफियांविरुद्ध कुठलीही कारवाई नाही

मारेगाव: तालुक्यातील शिवणी धोबे येथील झगळा घाटावर दिवसरात्र रेतीची रेती माफियांकडून अवैधरित्या तस्करी केली जात आहे.सविस्तर वृत्त असे की सूत्रांकडून मिळालेल्या माहितीनुसार शिवणी धोबे येथून 1.5 किलोमीटर अंतरावर असणाऱ्या वर्धा नदीतील झगळा घाटावर गेल्या 2 महिन्यापासून दिवस रात्र रेतीची परिसरातील रेती माफियांकडून अवैधरित्या वाहतूक केली जात आहे. या संदर्भात स्थानिकानी महसूल विभागाला तक्रारी केल्यानंतरही महसूल विभाग मात्र झोपेचे सोंग घेऊन आहे.कानडा तसेच परिसरातील घरकुल योजने अंतर्गत मंजूर झालेले घरकुल बांधण्यासाठी रेती मिळत नाही आहे मात्र कॅनल चे बांधकाम करण्यासाठी रेती मिळत आहे.कॅनल बांधकामासाठी रेती कुठून उपलब्ध होते हाही प्रश्न अनुत्तरीत आहे. तसेच रेती माफियाद्वारे रेती तस्करी करून ती रेती कुणाच्या तरी शेतात टाकल्या जात असल्याची माहिती सूत्रांकडून मिळाली आहे.

या रेतीतस्करांवर महसूल विभागाने कुठलीही कार्यवाही न करता या रेती तस्करी कडे दुर्लक्ष केले आहे. यामुळे महसूल विभागाची भूमिका संशयाच्या घेऱ्यात आली आहे.महसूल विभागाच्या दुर्लक्षपणामुळे शासनाला मिळणारा लाखो रुपयांचा महसूल बुडाला आहे. महसूल विभागाने तसेच पोलिस विभागाने रेती तस्करी करणाऱ्यांवर त्वरित कारवाही करून ही अवैध रेती तस्करी थांबवावी अशी स्थानिकांची भूमिका आहे.