नुकसानग्रस्त शेतीचे तात्काळ पंचनामे करा जिल्हाधिकारी अमोल येडगे

नुकसानग्रस्त शेतीचे तात्काळ पंचनामे करा

जिल्हाधिकारी अमोल येडगे

✍️गणेश खडसे

शहर प्रतिनिधी यवतमाळ

यवतमाळ:-दि १८ मार्च:- जिल्ह्यात काल व आज झालेला अवकाळी पाऊस व गारपीटीमुळे नुकसान झालेल्या शेतिपिकांचे तात्काळ पंचनामे करण्याचे आदेश जिल्हाधिकारी अमोल येडगे यांनी सर्व तहसिलदारांना दिले आहेत.

जिल्हयात १७ मार्चपासुन वादळी वा-यासह अवकाळी पाऊस सुरू असून काही तालुक्यात गारपीट झाल्याचे निदर्शनास येत आहे. त्यासाठी संबधित तालुक्याचे तहसिलदार यांनी बाधीत क्षेत्रास व्यक्तीशः भेट द्यावी. तसेच मंडळ अधिकारी, तलाठी, कृषी सहायक यांचे मदतीने तात्काळ

पंचनामे ,सर्वेक्षण करून शेतीपिकांचे नुकसानीचा अहवाल २ दिवसात सादर करण्यास सांगितले आहे. अहवाल प्राप्त होताच नुकसान भरपाई साठी शासनाकडे निधी मागणी करण्यात येईल असे जिल्हाधिकारी यांनी कळविले आहे.

आज पुसद, उमरखेड आणि दिग्रस तालुक्यात गारपिट झाली असुन त्याचेही पंचनामे करण्यास जिल्हाधिकारी यांनी सांगितले. काल लाडखेड, महागाव आणि दारव्हा या तीन मंडळात अतिवृष्टी झाली आहे.

तर उमरखेड आणि पुसद तालुक्यात मंडळ अधिकारी आणि तलाठी यांनी भेट देऊन नुकसानग्रस्त गव्हाच्या शेतीची पाहणी करुन पंचनामे करण्यास सुरुवात केली आहे.