*कृषि महोत्सवाचे आयोजन १८ ते २२ मार्च दरम्यान* *संशोधीत कृषि तंत्रज्ञान, बाजारपेठ व्यवस्थापन, कृषि पुरक व्यवसाय इत्यादीबाबत मार्गदर्शन* *रोजगार मेळावा, आरोग्य तपासणी शिबीर व पशुपक्षी प्रदर्शन राहणार आकर्षण*

भारतीय वार्ता :गणेश खडसे 

यव्तरमाळ, दि, ११ मार्च :- शेतकऱ्यांना शासनाच्या विविध कृषि योजना व उपक्रमाची माहिती, संशोधीत कृषि तंत्रज्ञान, नाविण्यपुर्ण प्रयोगशिल शेतकऱ्यांचे अनुभव, बाजारपेठ व्यवस्थापन, कृषि पुरक व्यवसाय इत्यादीचे मार्गदर्शन उपलब्ध व्हावे तसेच

उत्पादक ते ग्राहक थेट विक्री या संकल्पनेवर आधारीत धान्य, खाद्य व  सेंद्रीय शेतीमाल ग्रहकांना थेट विक्री करण्यासाठी यवतमाळ जिल्हयामध्ये कृषि महोत्सव आयोजीत करण्यात येत आहे. सदर महोत्सव १८ ते २२ मार्च दरम्यान समता मैदान ( पोस्टल ग्राऊंड) यवतमाळ येथे होत आहे. प्रकल्प संचालक आत्मा तथा जिल्हा अधिक्षक कृषि अधिकारी व महिला आर्थीक विकास महामंडळ यांचे संयुक्त विद्यमाने हा महोत्सव आयोजित करण्यात येत आहे.

या महोत्सवाचे उद्घाटन १८ मार्चला दुपारी १ वाजता राज्याचे कृषिमंत्री अब्दुल सत्तार यांचे हस्ते होणार असुन अन्न व औषध प्रशासन मंत्री तथा जिल्ह्याचे पालकमंत्री संजय राठोड यांचे अध्यक्षतेखाली व इतर  लोकप्रतिनिधी यांचे उपस्थितीत पार पडणार आहे.

यवतमाळ जिल्हयात बदलत्या परिस्थितीत शेतकऱ्यांना उत्पादन वाढीसाठी प्रोत्साहन देण्यास वाव आहे. प्रयोगशिल व प्रगतिशील शेतकऱ्यांच्या माध्यमातुन शेतकऱ्यांना आप-आपसातील विचारांची देवाण-घेवाण

करण्यास व्यासपीठ उपलब्ध करुन दिल्यास त्यांच्यातील आत्मविश्वास वृध्दींगत होऊ शकतो. आधुनिक कृषि तंत्रज्ञानाचा अवलंब केल्यास शेतकरी आर्थिक दृष्ट्या उन्नत होऊन जागितक पातळीवरील स्पर्धाक्षम वातावरणात आपले स्थान सिध्द करु शकतील.

म्हणुनच सदर कृषि महोत्सवात शेतकऱ्यांना शासनाच्या विविध कृषि योजना व उपक्रमाची माहिती, संशोधीत कृषि तंत्रज्ञान, नाविण्यपुर्ण प्रयोगशिल शेतकऱ्यांचे अनुभव, बाजारपेठ व्यवस्थापन, कृषि पुरक व्यवसाय इ. बाबतचे मार्गदर्शन उपलब्ध होणार आहे. तसेच कृषि प्रदर्शन, कृषि परिसंवाद आणि अनुभवी शेतकरी व उद्योजकांची व्याख्याने, यशस्वी शेतकरी, शास्त्रज्ञ, तंत्रज्ञ व विचारवंत यांची भेट या कृषि महोत्सवात घडवुन आणण्यात येणार आहे .

महोत्सवा दरम्यान कौशल्य विकास विभागामार्फ़त रोजगार मेळावा, आरोग्य विभागामार्फत आरोग्य तपासणी शिबीर, पशुसंवर्धन विभागामर्फत पशपक्षी  प्रदर्शन, कृषि संलग्न कंपन्यांचा समावेश, शेतकरी सन्मान समारंभ तसेच सांस्कृतिक कार्यक्रमाचे आयोजन करण्यात आले आहे.

सप्त खंजरी वादक संदिप पाल महाराज यांचे भजन, डॉ. मिर्झा रफ़ी अहमद बेग – मिर्झा एक्सप्रेस, नागपुर येथील कापुस पिकावर कृषि किर्तन करणारी शास्त्रज्ञ चमु त्याचबरोबर गुडीपाडव्याला डॉ. राहुल एकबोटे यांची चैत्र पहाट हा संगीत कार्यक्रम होणार आहेत.

याशिवाय महोत्सवात भास्करराव पेरे पाटिल, पंजाबराव डख,  पोपटराव पवार ईत्यादी मान्यवरांचे शेतक-यांना बहुमोल मार्गदशन लाभणार आहे.

सदर कार्यक्रमाचे व्यापक स्वरुप पाहता शासन निर्णयानुसार उत्पादक ते ग्राहक थेट विक्री या संकल्पनेवर आधारीत धान्य व खाद्य महोत्सव, कृषि निविष्ठा, कृषि तंत्रज्ञान व सिंचन, गृहपयोगी वस्तु या स्टॉल्सचा सहभाग असेल. त्यापैकी गृहपयोगी वस्तु, कृषि निविष्ठा, कृषि तंत्रज्ञान व सिंचन यासाठीचे स्टॉल प्रायोजकत्व निधीच्या

बदल्यात आरक्षित करण्यात येणार आहेत.

तरी इच्छुकांनी स्टॉल्स आरक्षित करण्यासाठी प्रकल्प संचालक आत्मा कार्यालयाशी  07232-241162, 9623841251, 9764740851 या क्रमांकावर संपर्क साधुन  स्टॉल आरक्षित करावा.  तसेच जास्तीत जास्त नागरिक, शेतकरी यांनी महोत्सवात भेट द्यावी आणि ग्राहकांनी थेट शेतक-यांचा शेतमाल खरेदी करावा असे आवाहन जिल्हाधिकारी अमोल येडगे यांनी केले आहे.