खडकी अडेगांव रस्त्यामधील खड्ड्यामुळे रहदारी करताना नाहक त्रास.

झरी(तालुका प्रतिनिधी):- खडकी ते अडेगाव रस्ता बनलाय खड्यांचा रस्ता. याच रस्त्याकरीता मंगेश पाचभाई यांनी रस्ता दुरुस्ती डांबरीकरण साठी आंदोलन केले होते. त्यांच्या आंदोलनातून रस्ता दुरुस्ती करण्याची गरज असल्याचे दिसत होते. अडेगाव, खातेरा, वेडद येथील गावकर्यांना नेहमी तालुक्यातील सर्वात मोठे वणी, मुकूटबन मार्केटला अनेक कामांसाठी येजा करावे लागते. मुख्य रस्ता खडकी अडेगाव खातेरा असून रस्ता पुर्णपणे खराब झालेला आहे. रस्त्यात अनेक ठिकाणी मोठमोठी खड्डे पडले आहेत. 

बर्याच ठीकाणचे डांबर पुर्णपणे रखडलेले आहेत. काही वर्षा अगोदर बांधकाम विभागाचने रस्ता बनविला तेव्हा नाल्यावर तात्पुरते रपटे बांधल्यासारखे बांधून सारवासारव केलेली पाहायला मिळते. त्यामुळे नाल्यावर मजबूत पूलाची आवश्यकता सुध्दा आहे. कारण पावसाच्या दिवसांत नाले तूडूंब भरून वाहल्याने अनेक वेळा रस्ता बंद होते. अशा कारणांमुळे विद्यार्थ्यांना  विनाकारण त्रास सहन करावा लागतो. महामंडळ एसटीला सुध्दा थांबवून नाल्यावरील पाण्याचा प्रवाह कमी होण्याची वाट पहावी लागते.  काही नेते पुढार्यांनी रस्ता दुरुस्ती करण्याची आश्वासन दिले परंतु अजूनही रस्ता दुरुस्तीकरणाला कोणतीही सुर्वात झाली नाही. तरी मौठ्या पुढारी लोकप्रतिनिधींनी बांधकाम विभाग अधिकार्यांच लक्ष वेधून मजबूत रस्त्यासाठी प्रयत्न केला पाहिजे अशी अपेक्षा गावकऱ्यांनची आहे. अडेगाव, खातेरा, वेडद  गावकर्यांना अनेक नाल्यावर पूलासहीत मजबूत रस्त्याची गरज असल्याचे चर्चेतून ऐकायला मिळत आहे.