प्रधानमंत्री किसान सन्मान योजनेंतर्गत लाभार्थ्यांच्या त्रुटी निराकरणासाठी 25 मार्चला गावस्तरावर कॅम्पचे आयोजन

शेतकऱ्यांनी कॅम्पचा लाभ घेण्याचे जिल्हाधिकारी यांचे आवाहन

आशिष साबरे (यवतमाळ जिल्हा प्रतिनिधी):  प्रधानमंत्री किसान सन्मान निधी योजनेच्या लाभापासून कोणीही लाभार्थी डाटा दुरूस्तीच्या कारणास्तव वंचित राहता कामा नये, यासाठी 25 मार्च पासून गावस्तरावर कॅम्पचे आयोजन करून पात्र लाभार्थ्यांचा डाटा दुरूस्त करण्याचे निर्देश जिल्हाधिकारी अमोल येडगे यांनी प्रशासकीय यंत्रणेला दिले आहेत. तसेच शेतकऱ्यांनी या कॅम्पचा लाभ घेवून आपला मोबाईल नंबर, आधार क्रमांक अद्यावत करून व इतर त्रुट्या दुरूस्त करून घ्याव्या, असे आवाहनही त्यांनी केले आहे.

प्रधानमंत्री किसान सन्मान निधी योजनेअंतर्गत प्रलंबित डाटा दुरूस्तीची कार्यवाही मोहिम स्वरूपात राबविण्याबाबत पूर्व तयारीची आढावा बैठक जिल्हाधिकारी अमोल येडगे यांनी जिल्हाधिकारी कार्यालयातील महसूल भवन येथे काल सोमवार दिनांक 14 मार्च ला सभा घेतली. याप्रसंगी निवासी उपजिल्हाधिकारी ललितकुमार वऱ्हाडे, अधिक्षक कृषी अधिकारी नवनाथ कोळपकर, जिल्हा परिषदेचे उपमुख्य कार्यकारी अधिकारी अर्जून गुडधे, जिल्हा सूचना व विज्ञान अधिकारी राजेश देवते प्रामुख्याने उपस्थित होते.

शेतकऱ्यांना निश्चित उत्पन्न मिळण्याकरिता केंद्र शासनाने प्रधानमंत्री किसान सन्मान निधी (पी एम किसान) योजना फेब्रुवारी 2019 पासून सुरू केली आहे. या योजने अंतर्गत नोंदणी केलेल्या पात्र लाभार्थ्यांना मदतीचे हप्ते वितरीत करण्यात येत आहेत. तथापि यात बँक ट्रान्झेक्शन फेल्युअर डाटा, आधार दुरूस्ती, बचत खाते ॲक्टीव नसने, बचत खाते क्रमांक व आय.एफ.एस.सी. कोड न जुळणे, आधार कार्ड व अर्जातील नावात फरक येणे इत्यादी त्रुट्या निधी वितरणात येत आहेत. 

यासाठी प्रत्येक गावात महसूल, ग्रामविकास व कृषी विभागाच्या अधिकारी कर्मचारी यांनी  शेतकरी मित्रांच्या सहकार्याने प्रलंबित डाटा दुरूस्तीची कार्यवाही पुर्ण करण्याचे व लाभार्थ्यांची 100 टक्के भौतिक तपासणी करण्याच्या सूचना जिल्हाधिकारी अमोल येडगे यांनी बैठकीत दिल्या. शेतकऱ्यांनी यावेळी आपले आधार कार्ड, बँक खाते तपशील, चेकबुक, सात-बारा चा उतारा इत्यादी कागदपत्रे सोबत आणावी असेही त्यांनी सांगितले. बैठकीला संबंधीत अधिकारी उपस्थित होते.