मोदी सरकारने जाहिरातीऐवजी विकास योजनेवर खर्च करावे ।। खासदार बाळू धानोरकर यांचे प्रतिपादन.

आकाश बदकी यांच्या प्रचारार्थ आले असता ते मारेगाव येथील नगरपंचायत निवडणुकीच्या प्रचार सभेत बोलत होते.

दिलदार शेख (मारेगाव) : या देशात इंग्रजांनी देखील शासन केले. त्यावेळी प्लेग सारखी साथ आली होती. त्यावेळी त्यांनी लस दिली. त्या संकटातून भारतीयांना बाहेर काढलं. परंतु कोरोना काळात संकटातून बाहेर काढताना गोरगरीब जनतेच्या कष्टाच्या पैशातून मोदी सरकार जाहिरातीवर खर्च करीत आहे. हि जाहिरातबाजी थांबून सामान्यांच्या खिशातून जाणाऱ्या पैशातून योजना आखून बेरोजगारांना रोजगार दिला पाहिजे. सुरु असलेली चमकोगिरी मोदी सरकारने थांबवावी, अशी टीका खासदार बाळू धानोरकर यांनी केली. ते मारेगाव येथील नगरपंचायत निवडणुकीच्या प्रचार सभेत बोलत होते.

यावेळी माजी आमदार वामनराव कासावार, यवतमाळ जिल्हा बँक अध्यक्ष टीकाराम कोंगरे, मारेगाव कृषी उत्पन्न बाजार समिती सभापती नरेंद्र पाटील ठाकरे, रंगनाथ स्वामी बँकेचे अध्यक्ष ऍड. देविदास काळे, जिल्हा परिषद सदस्य अरुणाताई खंडाळकर, मारेगाव तालुका अध्यक्ष मारोतराव गौरकार, वसंत जिनिंगचे संचालक सुनील वरारकर, जेष्ठ नेते मुन्नाभाई कुरेशी, रावजी बोरीले, तालुका सचिव शंकर मडावी, यादव पांडे यांची उपस्थिती होती.

पुढे बोलताना खासदार बाळू धानोरकर म्हणाले की, मोदी सरकार शेतकरी विरोधी सरकार आहे. ७५० शेतकरी आंदोलनात मृत्यूमुखी पडले. त्यांच्या बायका विधवा, मूल पोरकी करण्याचं पाप या मोदी सरकारने केलं आहे. हि निवडणूक नगर पंचायतीची असली तरी या क्षेत्राचा विकास करायचा असेल तर काँग्रेसचा उमेदवाराव्यतिरिक्त दुसरा पर्याय नाही, असे प्रतिपादन खासदार बाळू धानोरकर यांनी केले.