दुचाकीवरुन आलेल्या मारेकऱ्यांकडून गोळ्या घालून डॉक्टरची हत्या, यवतमाळ हादरलं..!

उमरखेड येथील राजाराम प्रभाजी उत्तरवार शासकीय रुग्णालयातील बालरोग तज्ज्ञाची गोळ्या झाडून निर्घृन हत्या करण्यात आली. ही घटना मंगळवारी रुग्णालयासमोरील गोरखनाथ हॉटेलच्या समोर दुपारी ४.३० वाजताच्या सुमारास घडली.

यवतमाळ : उमरखेड येथील राजाराम प्रभाजी उत्तरवार शासकीय रुग्णालयातील बालरोग तज्ज्ञाची गोळ्या झाडून निर्घृन हत्या करण्यात आली. ही घटना मंगळवारी रुग्णालयासमोरील गोरखनाथ हॉटेलच्या समोर दुपारी ४.३० वाजताच्या सुमारास घडली. भरदिवसा घडलेल्या या घटनेने एकच खळबळ उडाली आहे.

डॉ. हनुमंत धर्मकारे (४२) असे मृत बालरोग तज्ज्ञाचे नाव आहे. डॉ. हनुमंत धर्मकारे मागील सात वर्षांपासून उत्तरवार शासकीय रुग्णालयात बालरोग तज्ज्ञ म्हणून कार्यरत होते. याशिवाय त्यांचे उमरखेड बसस्थानकाच्या समोर खासगी बाल रुग्णालय आहे.

नेहमीप्रमाणे ते मंगळवारी देखील रुग्णालयात ड्युटीवर आले होते. दुपारच्या सुमारास ते चहा घेण्यासाठी गोरखनाथ हॉटेलमध्ये गेले. चहा घेतल्यानंतर हॉटेलमधून रुग्णालयात जाण्यासाठी बाहेर येत असताना अज्ञात दुचाकीस्वाराने त्यांच्या छाती व पोटावर बेछूट गोळीबार केला. त्यामुळे डॉक्टर रक्ताच्या थारोळ्यात खाली कोसळले. यावेळी आजूबाजूच्या नागरिकांनी गोळीबार करणाऱ्या दुचाकीस्वाराला पकडण्याचा प्रयत्न केला. मात्र मारेकरी शाईन वाहनाने भरधाव वेगाने पसार झाला.
यावेळी रक्ताच्या थारोळ्यात पडलेल्या डॉक्टरला नागरिकांनी उचलून येथील शासकीय रुग्णालयात उपचारासाठी दाखल केले. वैद्यकीय अधीक्षक डॉ. रमेश मांडण यांनी डॉ. धर्मकारे यांना मृत घोषित केले. ही घटना शहरात वाऱ्यासारखी पसरली. त्यानंतर नागरिकांनी येथील शासकीय रुग्णालयात एकच गर्दी केली.
विशेष म्हणजे आज माजी गृहराज्यमंत्री रणजीत पाटील हे उमरखेडच्या दौऱ्यावर होते. त्यांना या घटनेची माहिती मिळताच त्यांनी घटनास्थळाला भेट दिली. यावेळी त्यांच्या समवेत आमदार नामदेव ससाने, भाजपा जिल्हाध्यक्ष नितीन भुतडा आदी उपस्थित होते.
दरम्यानच्या काळात वातावरण शांत ठेवण्यासाठी उपविभागीय अधिकारी व्यंकट राठोड, उपविभागीय पोलीस अधिकारी प्रदीप पाडवी, उमरखेड पोलीस स्टेशनचे ठाणेदार अमोल माळवे आदी परिस्थितीवर लक्ष ठेवून आहेत.