चवदार तळ्याचा सत्याग्रह म्हणजे समतेसाठीचा लढा होय दिलीप टिपणीस यांचे प्रतिपादन

चवदार तळ्याचा सत्याग्रह म्हणजे समतेसाठीचा लढा होय

        दिलीप टिपणीस यांचे प्रतिपादन

   गडचिरोली

✍️मुनिश्वर बोरकर

      गडचिरोली :- डॉ. बाबासाहेब आंबेडकर यांनी सामाजिक समतेसाठी अनेक लढे उभारले. सार्वजनिक ठिकाणी अस्पृश्यांना मंदिर प्रवेश मिळावा,  पिण्यासाठी पाणी मिळावे म्हणून अहिंसक मार्गाने आंदोलने उभारली. 20 मार्च 1927 रोजी डॉ.बाबासाहेब आंबेडकर यांच्या नेतृत्वात महाड येथे चवदार तळ्याचा सत्याग्रह झाला.  त्या तळ्याचे पाणी प्रथम डॉ. आंबेडकरांनी प्यायले आणि हजारो अस्पृश्य लोकांनी त्यांचे अनुकरण केले. डॉ. बाबासाहेब आंबेडकर यांचा हा लढा म्हणजे समतेसाठीचा लढा होय असे प्रतिपादन डॉ.बाबासाहेब आंबेडकर यांचे विश्वासू सहकारी व महाड मुक्तिसंग्रामाचे प्रमुख नेते सुरबा नाना टिपणीस यांचे नातू दिलीप टिपणीस यांनी केले.

      स्थानिक सम्यक बुद्ध विहार गोकुळ नगर येथे  "क्रांती चवदार तळ्याची"  या विषयावर व्याख्यान करताना ते बोलत होते.

       भारतीय बौद्ध महासभा जिल्हा शाखा, सम्यक जेष्ठ नागरिक बहुउद्देशीय संस्था, विशाखा महिला मंडळ  तसेच सम्यक समाज समिती यांच्या सहयोगाने या कार्यक्रमाचे आयोजन करण्यात आले होते.

    कार्यक्रमाच्या अध्यक्षस्थानी सामाजिक कार्यकर्ते रोहिदास राऊत तसेच प्रमुख पाहुणे म्हणून नागपूर येथील श्रीराम बनसोड, डॉ. एम. ए. रायपुरे, केंद्रीय शिक्षक तथा बौद्धाचार्य धर्माजी बांबोळे, सरचिटणीस प्रा. गौतम डांगे, विनोद निंभोरकर,  एम. यु.  तितरे  उपस्थित होते.

     पुढे बोलताना दिलीप  टिपणीस म्हणाले की,  विषमतेवर आधारित असलेल्या मनुस्मृतीचे 25 डिसेंबर 1927 रोजी डॉ.आंबेडकर यांनी जाहीर दहन केले तसेच संविधानाच्या माध्यमातून सर्वांना समानतेचे अधिकार दिले.

       सर्वप्रथम तथागत भगवान गौतम बुद्ध,  डॉ. बाबासाहेब आंबेडकर,  सावित्रीबाई फुले यांच्या प्रतिमांना  माल्यार्पण करून त्रिशरण पंचशील घेण्यात आले.

    श्रीराम बनसोड म्हणाले की, महाड येथील क्रांती स्तंभ हा स्वाभिमानाचे प्रतीक आहे. डॉ. बाबासाहेब आंबेडकरांनी आपल्याला स्वाभिमान शिकविला.  बुद्धाचा विज्ञानवादी धम्म दिला म्हणून डॉ. बाबासाहेब आंबेडकरांचे कार्य पुढे नेणे आपले सर्वांचे कर्तव्य आहे असे प्रतिपादन केले.

     चवदार तळ्याचा सत्याग्रह म्हणजे सामाजिक चळवळीला दिशा देणारे एक अहिंसक आंदोलन होय.डॉ. बाबासाहेब आंबेडकरांचे कार्य हे प्रत्येकाला प्रेरणादायी आहे प्रतिपादन अध्यक्ष पदावरून बोलताना रोहिदास राऊत यांनी केले.

    मिलिंद टिपणीस तसेच श्रीराम बनसोड यांचा शाल व पुष्पगुच्छ देऊन याप्रसंगी सत्कार करण्यात आला.

      ज्येष्ठ नागरिक नागरिक बहुउद्देशीय संस्थेचे अध्यक्ष कडूजी उंदीरवाडे ,विशाखा महिला मंडळ अध्यक्षा सुमित्रा राऊत, सम्यक समाज समितीचे अध्यक्ष हंसराज उंदीरवाडे, भारतीय बौद्ध महासभेचे शहर अध्यक्ष बाळकृष्ण बांबोळे, तसेच साखरा, अडपल्ली, गोगाव,गडचिरोली येथील बौद्ध समाजाचे उपासक, उपासिका मोठ्या संख्येने उपस्थित होते.

      कार्यक्रमाचे संचालन भारतीय बौद्ध महासभेचे जिल्हाध्यक्ष तुलाराम राऊत यांनी केले. सरचिटणीस प्रा. गौतम डांगे यांनी उपस्थितांचे आभार मानले.

     कार्यक्रम यशस्वी करण्यात  कोषाध्यक्ष मोरेश्वर अंबादे,कालिदास राऊत,उपाध्यक्ष लहू रामटेके, शहराध्यक्ष बाळकृष्ण बांबोळे, सुरेखा बारसागडे, मनीषा  वारके,अरुणा राऊत इत्यादींनी सहकार्य केले.