मानकी येथे सरपंच पदी कैलास पिपराडे, उपसरपंच पदी शंकर माहुरे यांची अविरोध निवड..

वणी:  एकीकडे देशासह राज्यात कॉंग्रेस, भाजप व शिवसेना या पक्षांत एकमेकांच्या विरोधात सुडाचे राजकारण सुरू असतांना मात्र मानकी येथे ह्या तिन्ही पक्षांच्या पदाधिकारी व कार्यकर्त्यांनी आपण तिन्ही भाऊ भाऊ, गावाच्या विकासासाठी एकत्र येऊ म्हणत सरपंच, उपसरपंच पदाची निवड अविरोध झाली आहे. मानकी गावाच्या इतिहासात पहिल्यांदाच  सरपंच पदी भाजपाचे तालुका सरचिटणीस कैलास पिपराडे व  उपसरपंच पदी कॉंग्रेसचे शंकर माहुरे यांची अविरोध निवड करण्यात आली आहे.
    तालुक्यातील माणकी येथे भाजप, शिवसेना व कॉंग्रेस या तीन पक्षांचे स्वतंत्र गट आहेत. त्यामुळे आता सरपंच, उपसरपंच कोण होईल याकडे सर्वांचे लक्ष लागले होते. शिवसेना समर्थित भाजपाचे चार व कॉंग्रेसचे तीन सदस्य असल्याने चार सदस्य असलेल्या भाजपाचेच सरपंच, उपसरपंच होणार असे चित्र असतांना मात्र कॉंग्रेसला उपसरपंच पद देऊन दिलेला शब्द पाळण्यात आला आहे. कारण ग्रामपंचायत निवडणूकीपुर्वी भाजप, शिवसेना व कॉंग्रेस या तिन्ही पक्षांच्या पदाधिकारी, कार्यकर्त्यांनी एकत्र येऊन निवडणूक बिनविरोध करण्यासाठी भाजपाचा सरपंच तर काॅंग्रेसचा उपसरपंच असे समीकरण जुळवून आणले होते. त्यानुसार शिवसेना समर्थित भाजपाच्या सदस्यांनी कॉंग्रेसला उपसरपंच पद देऊन आपला शब्द पाळला आहे. विशेष म्हणजे राजकारणात दिलेल्या शब्दाला किंमत राहत नाही. परंतु मानकी येथे भाजप, कॉंग्रेस आणि शिवसेना या तिन्ही पक्षांच्या पदाधिकारी, सदस्यांनी राजकारण न करता गाव- विकासासाठी एकत्र येऊन ग्रामपंचायत निवडणूक अविरोध केली आहे. त्यामुळे आता गाव विकासासाठी सर्वांनी एकत्र येऊन काम करणार आहेत.
      सरपंच पदी कैलास पिपराडे, उपसरपंच पदी शंकर माहुरे तर सदस्या म्हणून नानाजी पारखी,  इंदिरा परशुराम पोटे, वंदना कैलास पिपराडे, सुनिता सुनिल कुत्तरमारे,नलीनी मिलमिले या सदस्यांची अविरोध निवड करण्यात आली आहे.