घुग्गुस शहरात असलेले अनाधिकृत होल्डिंग्स, बॅनर नगरपरिषदेने हटविले, मुख्याधिकाऱ्यांची कारवाई..!

घुग्गुस (प्रतिनिधी): घुग्गुस शहरात लागून असलेले  अनाधिकृत होल्डिंग्स,बॅनर आज नगर परिषदेच्या मुख्याधिकारी आर्शिया जुही यांच्या मार्गदर्शनात काढण्यात आले आहे. त्यामुळे कोणत्याही राजकीय पक्षांना शहरात बॅनर लावायचे असल्यास नगर परिषदेची परवानगी घेऊनच बॅनर लावावे अशी विनंती मुख्याधिकार्यांनी केली आहे. गेल्या काही वर्षांत अनधिकृत फलकांचे शहर म्हणून घुग्गुस शहर ओळखला जात आहे, या अनधिकृत फलकांनी केवळ शहराचे विद्रुपीकरण झाले असे नाही, तर कायदा व सुव्यवस्थेचेही प्रश्न निर्माण केले आहेत.तसेच नगर परिषदेचा कर सुद्धा मोठ्या प्रमाणात बुडत आहे.

सत्ताधारी व विरोधी अशा सर्व पक्षांच्या कार्यकर्त्यांमध्ये फलक उभारण्याची जणू स्पर्धाच लागली आहे. परिणामी, शहरातील गल्लीबोळांसह प्रमुख रस्ते व चौक अनधिकृत फलकांच्या जंजाळात सापडले आहेत. त्यामुळे वाहतुकीला अडथळे येण्याबरोबर अपघातही घडण्याची शक्यता नाकारता येत नाही. त्यामुळं आज नगर परिषदेच्या वतीने मुख्याधिकारी आर्शिया जुही यांच्या नेतृत्वात संवर्ग विकास अधिकारी संदीप वानखेडे, विक्रम क्षीरसागर, शंकर पचारे,संदीप मत्ते,रवींद्र गोहोकार आदी कर्मचाऱ्यांनी शहरात लागलेले बॅनर होल्डिंग्स काढले आहे. तसेच शहरात फलक बॅनर लावायचे असल्यास नगर परिषदेची परवानगी घ्यावी अशी ताकीद देण्यात आली आहे.