एकाच महिन्यात हनुमान नगर येथे दोनदा विजेचे अस्मानी आक्रमण..!

कडुनिंबाच्या झाडावर एकाच महिन्यात दोन दा वीज कोसळली.

राजू गोरे (शिंदोला) : हनुमान नगर एनक येथे एकाच महिन्यात दोनदा विजेचे अस्मानी आक्रमण झाले आहे. हनुमान नगर येथील रहिवाशी श्री विठ्ठल खंडू गोरे यांच्या अंगणात असलेल्या कडुलिंबाच्या झाडावर एकाच महिन्यात दोनदा वीज कोसळून प्रचंड प्रमाणात आर्थिक नुकसान झालेले आहे. काल दिनांक 6/9/2021 रोजी रात्री आठ वाजून वीस मिनिटांनी अंगणातील कडुनिंबाच्या झाडावर वीज कोसळली. यात श्री विठ्ठल गोरे यांच्या घरातील सर्व विद्युत उपकरणे जळाली असून निकामी झाली आहेत.

तसेच प्रवीण मेश्राम यांच्या घरातील सर्व विद्युत उपकरणे जलून निकामी झाली आहेत. श्री रशीद सागर शेख, आशिष बोरकर ,अंकुश गुडेपवार, रवींद्र पांगुळ, राजू निमकर व इतर सर्व हनुमान नगर वासियांच्या घरातील विद्युत उपकरणे विजेच्या तडाख्याने निकामी होऊन सर्वांचे लाखो रुपयांचे नुकसान झाले आहे. विशेष म्हणजे एक महिन्या आधी सुद्धा याच ठिकाणी वीज पडून अनेक रहिवाशांच्या घरातील घरातील विद्युत उपकरणे विजेच्या तडाख्याने निकामी झाली होती. प्रशासनाने पंचनामा केला पण एका कवडीचीही मदत नुकसानग्रस्तांना दिली नाही आणि काल पुन्हा दुसऱ्यांदा विजेचा तडाखा सर्वांना बसला, या दुहेरी संकटामुळे सर्व नुकसानग्रस्त हवालदिल झाले आहेत आणि जीव मुठीत घेऊन जगत आहेत.

विजेचा तडाखा हनुमान नगर ला नेहमी बसत असून यावर तोडगा काढून प्रशासनाने कायमस्वरूपी उपाय योजना करावी. व विज रोधक हनुमान नगर येथे बसवावे .अशी गावकऱ्यांनी मागणी केली आहे. तसेच काल झालेल्या नुकसानीचे पंचनामे करून नुकसानग्रस्तांना भरपाई देण्यात यावी. अन्यथा तहसील पुढे ठिय्या आंदोलनाचा इशारा नुकसानग्रस्तांना दिला आहे. प्रशासनाने या गोष्टीकडे गांभीर्याने लक्ष द्यावे अशी हनुमान नगर वाशीयांची मागणी आहे.