ट्रक ने रेल्वे गेट ला दिली धडक..!

घुग्गुस येथील एसीसी हैडगेज गेट न.3 येथील घटना

घुग्गुस (प्रतिनिधी): ट्रक ने रेल्वे गेट ला धडक दिल्याची घटना आज गुरुवारी दुपारच्या सुमारास घुग्गुस येथील एसीसी हैडगेज गेट न.3 येथे घडली असून मोठा अपघात टळला आहे.सपरा कंपनीचा ट्रक मुंगोली पैनगंगा येथून कोळसा भरून येत होता. अशातच आज दुपारच्या सुमारास ट्रक ने घुग्गुस येथील एसीसी हैडगेज गेट नंबर 3 येथील रेल्वे फाटकाला धडक दिली.हा ट्रक शैलेश जाधव यांच्या मालकीचा असून वाहन चालक जावेद खान याच्या दुर्लक्षीत पणामुळे हा अपघात झाला आहे. फाटकाच्या जवळच हायपावर व्होल्टेज चे जिवंत विद्युत तार असून सुदैवाने ट्रक चा स्पर्श झाला नाही, त्यामुळे मोठी दुर्घटना टळली आहे.

या मार्गावरून जड वाहतूक बंद करण्यात यावी अशी मागणी येथून रहदारी करणाऱ्या नागरिकांनी अनेकदा केली होती.तसे निवेदन सुद्धा वेकोली व संबंधित अधिकाऱ्यांना देण्यात आले होते. मात्र याकडे दुर्लक्ष होत असून ही वाहतूक नागरिकांच्या जीवावर बेतण्याची शक्यता नाकारता येत नाही.