'सुगावा स्कूल' चे संस्थापक प्रा.विलास वाघ यांचे दुःखद निधन !

'सुगावा स्कूल' चे संस्थापक प्रा. विलास वाघ यांचे दुःखद निधन!

भारतीय वार्ता (प्रतिनिधी):   महाराष्ट्रातील परिवर्तनवादी चळवळीचे अग्रणी, मार्गदर्शक व कर्ते सुधारक प्रा. विलास वाघ यांची एक्झिट अतिशय दुःखद घटना आहे.
'सुगावा' कार म्हणून त्यांना आख्खा महाराष्ट्र ओळखतो. 'कोणत्याही चळवळीला मुखपत्र पाहिजे' हा बाबासाहेबांचा विचार अंमलात आणणारे विलास वाघ व उषा वाघ हे कार्यकर्ते दांपत्य 'सुगावा' मासिकाच्या रुपाने परिवर्तनवादी कार्यकर्त्यांच्या घरघरात पोहोचलेले आहे. 
      पुणे विद्यापीठाच्या एन एस एस व प्रौढ शिक्षण व तत्सम योजना व उपक्रम विद्यार्थ्यांपर्यंत नेमकेपणाने वाघ सरांनी पोहोचवलेले आहे. 
आंतरजातीय विवाह संस्था सरांनी सोदाहरण व सक्रीयपणे चालविली आहे.विचारवंत  प्रा.डाँ. रावसाहेब कसबेपासून ते नवोदित वैचारिक लेखकांचे ते हक्काचे प्रकाशक होते.
'सुगावा' च्या शेकडो महत्वपूर्ण ग्रंथाचे छपाई, प्रकाशन, वितरण व विक्री त्यांनी स्वतः केलेली आहे.
जिथे जिथे साहित्य संमेलन असेल तिथे तिथे वाघ सरांनी सुगावा प्रकाशनचा स्टाँल लावलेला आहे. 
विलास वाघ सरांभोवती नेहमी सामाजिक, साहित्यिक कार्यकर्त्यांचे मोहोळ असते.
व्यक्तिगत ख्यालीखुशाली आणि विविध उपक्रमांची विचारपूस आणि मार्गदर्शन करण्यात वाघ सर नेहमी अग्रेसर असत.
माझा काँलेजजीवनापासून ते आजतागायत वाघ सरांशी संपर्क होता, 'सुगावा' चा मी आजीव वर्गणीदार असल्याने बरेचदा पत्रव्यवहारही होत असे. 
बहुजनांच्या सामाजिक व राजकीय उत्थानासाठी वाघ सरांचे योगदान अमूल्य आहे. स्मृतिशेष विलास वाघ सरांना माझी भावपूर्ण आदरांजली व क्रांतिकारी अभिवादन !