शिक्षणाच्या माहेरघरात शिक्षणाची दारे बंद.!

महाविद्यालय, शाळा सुरू करण्याची वाट पहात आहोत. ऑनलाइन साठी ग्रामीण भागात संसाधने तोकडी आहेत. स्पर्धेच्या युगात विद्यार्थी मार्गदर्शनापासून वंचित आहेत. शासनाने कमी कोरोना असलेल्या भागात मार्गदर्शन तत्वाचे पालन करून चालू करण्यास काही हरकत नाही : प्राचार्य डॉ. एन. एस. कोकोडे.

ब्रम्हपुरी (क्रिष्णा वैद्य) : पंचक्रोशीत ब्रम्हपुरी हे शिक्षणाचे माहेरघर म्हणून प्रसिद्ध आहे. कोरोना महामारीचा मोठा आघात शिक्षणावर झाला आहे. गेली दीड वर्षांपासून शिक्षणाची दारे बंद आहेत. त्यामुळे शिक्षणनगरी हि सध्या शिक्षणाची दारे उघडण्याच्या दिवसाची वाट बघत आहे.

ब्रम्हपुरी तालुक्यातील ग्रामिण भागातील शाळा सुरू झाल्या आहेत. पण शहरातील शाळा कॉलेजेस मात्र बंद आहेत. शिक्षणाची गंगा ब्रम्हपुरीतुन उगम पाहून ही ग्रामीण भागात वाहत जाण्याचा अखंड प्रवाह आता मात्र उलट्या दिशेने वाहताना दिसून येत आहे. शहरात आठ जि.प.शाळा,एक खाजगी जी.प.शाळा, सहा खाजगी हायस्कूल, एक जी.प हायस्कूल, दोन सिबीएससी हायस्कूल, पाच इंग्लिश मिडीयम हायस्कूल,सात ज्युनिअर कॉलेज, चार पदवी महाविद्यालयात, दोन पदव्युत्तर महाविद्यालयात, दोन आयटीआय,पूर्वीची दोन डीएड व बीएड कॉलेज, एक शासकीय तंत्रनिकेतन महाविद्यालयात इतकी ज्ञानाची गंगा अविरतपणे ओसंडून वाहत होती. ती ज्ञानरुपी गंगा कोरोनाने गेल्या दीड वर्षांपासून हिरावून घेतली आहे.या ज्ञान गंगेत नागभीड, वडसा, आरमोरी, लाखांदूर, पवनी, सिंदेवाही, चिमूर आदी भागातून हजारो विद्यार्थी ज्ञानार्जन करण्यासाठी थवेच्या -थवे येत होती ती दीड वर्षांपासून बंद झाली आहेत. ब्रम्हपुरीच्या कानाकोपऱ्यात हि विद्यार्थी शासकीय अथवा खाजगी होस्टेल येथे वास्तव्य करायचे किंवा रूम किरायाने करून ज्ञान घ्यायचे ते सर्व भूतकाळात समाविष्ट झाले आहे. अनेक घरे आजही विद्यार्थ्यांविना खाली आहेत. त्यामुळेच एकूणच ब्रम्हपुरीतील शिक्षणाची दारे बंद असल्याचे दिसून येत आहे.

ऑनलाइन शिक्षण अपुरेच:

या काळात ऑनलाइन शिक्षण दिल्या जात आहे. पण माहीती व ज्ञानार्जनच्या दृष्टीने ते अपुरे वाटत असल्याने विद्यार्थी हिरमोड झाले आहेत. अनावश्यक मोबाईलचा खर्च पालकांवर पडलेला आहे. विद्यार्थी त्यातून अभ्यास कमी व शोसल मीडियाचा वापर जास्त करीत असल्याने शाळेची दारे उघडण्याची पालक वर्ग वाट पाहत आहे.