सुतळी बामच्या स्फोटात सहा जण  जखमी

पारधीगुडा येथील घटना

कोरपना:  सुतळी बामच्या स्फोटात तीन जण गंभीर तर तीन जण किरकोळ जखमी झाल्याची घटना बुधवारी दि.१० ला  ४.३० वाजताच्या सुमारास कोरपना तालुक्यातील पारधीगुडा येथे घडली. प्राप्त माहितीनुसार, पारधीगुडा येथील चौकात काही व्यक्ती चौसस्ट खेळत असताना नेताजी शेरकुरे नामक व्यक्ती प्लास्टिक पन्नी मध्ये चार सुतळी बाम घेऊन आला. त्यातून एक सुतळी बाम काढून त्याने लगतच फोडला.

त्याची चिंगारी उडून बाकीचे सर्व सुतळी बाम फटाके फुटले. यात तेथील रमेश पवार (४२) , धनराज शेरकुरे (३५), अनिल शेरकुरे (२८) याच्या हाता - पायाला गंभीर इजा पोहचली.तर उमेश काळे (३५), रमेश शेरकुरे (१८), लहू काळे (२२) रा. पारधीगुडा हे किरकोळ जखमी झाले. ग्रामस्थांनी लागलीच त्यांना ग्रामीण रुग्णालय कोरपना येथे जखमींना दाखल केले. यातील गंभीर जखमींना पुढील उपचाराकरता चंद्रपूर येथील जिल्हा रुग्णालयात रेफर करण्यात आले. घटनेचा पुढील तपास ठाणेदार सदाशिव ढाकणे यांच्या मार्गदर्शनाखाली कोरपना पोलीस करीत आहे.