महसूल विभाग वणी तालुक्यात 74 ग्रा.प. मध्ये निवडणुका घेण्यासाठी सज्ज

8 ग्रामपंचायत अविरोध

वणी:-   येत्या 15 जानेवारीला वणी तालुक्यातील 82 ग्रामपंचायतच्या निवडणुका जाहीर झाल्या होत्या. गावातील आपसी समाजस्यामुळे 8 ग्रामपंचायतीच्या निवडणुका अविरोध झाल्या आहेत. त्यामुळे येथील महसूल प्रशासन 74 ग्रामपंचायतीमध्ये निवडणुका घेण्यासाठी सज्ज असल्याची माहिती निवडणूक निर्णय अधिकारी तथा तहसीलदार श्याम धनमने यांनी दिली आहे. 
  वणी तालुक्यातील चिखली, चनाखा, कुड्रा, मुंगोली, गोवारी(को), पेटुर, शेवाळा, निवली या आठ गावच्या निवडणुका अविरोध झाल्या आहेत.  ज्या 74 ग्रामपंचायत मध्ये निवडणुका होत आहे त्यापैकी रासा, सुकानेगाव, वांजरी, राजूर( कॉ.), नांदेपेरा, लालगुडा, उकणी, पुनवट, घोन्सा ही आठ गाव संवेदनशील आहेत. त्यासाठी प्रशासनाने विशेष व्यवस्था केली आहे. या निवडणुकीसाठी वणी तालुक्यात एकूण 258 मतदान केंद्र निर्माण करण्यात आले आहे. यासाठी 284 मतदान अधिकाऱ्यांचे पथक प्रशिक्षण घेऊन निवडणूक प्रक्रिया पूर्ण करण्यासाठी सज्ज आहेत. प्रत्येक मतदान केंद्रावर एक केंद्राध्यक्ष, व इतर तीन मतदान अधिकारी यांची नियुक्ती करण्यात आली आहे. 74 ग्रामपंचायतीच्या निवडणुकीमध्ये 44040 पुरुष, 39544 स्त्री असे एकूण 83584 मतदार आपला मतदानाचा हक्क बजावणार आहेत.