कोरपना तालुक्यात पावसाचे तांडव 

शेत पिकांचे मोठे नुकसान; अनेक मार्ग बंद

कोरपना: बुधवारपासून पडणाऱ्या सतंतधार पावसामुळे कोरपना तालुक्यातील जनजीवन विस्कळीत झाले आहे. अनेक गावातील शेत शिवारात पावसाचे पाणी घुसल्याने कपाशी, सोयाबीन आदी पिकांचे मोठे नुकसान झाले आहे. तसेच अनेक महत्वाचे मार्ग आज ही बंद होते.

तालुक्यातील पंच्याहत्तर गावातील शेतशिवारातील पिकांना याचा मोठा फटका बसला. यात कोरपना सह कन्हाळगाव , नांदा , बिबी , पारडी , जेवरा, अंतरगाव , नारंडा, धानोली, वनसडी, सावलहिरा, कमलापूर, वडगाव, सोनुर्ली, आवारपूर, गाडेगाव, भारोसा, भोयेगाव, कवठाळा,लोणी, चिंचोली, कोडशी, पिपरी, पिपर्डा , शेरज, माथा आदी गावांचा समावेश आहे.

भोयगाव -  चंद्रपूर हा महामार्ग मध्यरात्री पासून बंद पडला आहे. त्यामुळे वाहनांच्या लांबच लांब रांगा लागल्या आहे.  अंतरगाव जवळील नाल्यावरील रपटा वाहून गेल्याने वनसडी - भोयगाव मार्ग बंद पडला आहे. तर सावलहिरा गावाजवळील रपटा वाहून गेल्याने गावकऱ्यांना जाण्या येण्याची अडचण निर्माण झाली आहे. कमलापुर गावातील काही घरात मध्यरात्री नाल्याचे पाणी घुसले गेले होते. त्यामुळे काही घराची अंशत पडझड झाली आहे. अति पावसामुळे कोरपना - आदिलाबाद, कोरपना - वणी , वनसडी - भोयगाव, वणोजा - गडचांदुर् मार्ग ही जागोजागी उखडला गेला आहे. पैनगंगा - वर्धा या दोन्ही नद्या दुथडी भरून वाहत असल्याने नदीकडच्या गावाला सतर्कतेचा इशारा प्रशासनातर्फे देण्यात आला आहे. अमलनाला व पकडीगुद्दम धरण ओव्हर फ्लो झाल्याने सांडव्यावरून पाणी ओसंडून वाहत आहे.