अकाली पावसाचा तडाखा, हजारो हेक्टर पिकाचे नुकसान || कापूस, तूर, हरभरा,गहू इत्यादी पिकांचे मोठ्या प्रमाणात नुकसान.

कापूस, तूर, हरभरा,गहू इत्यादी पिकांचे मोठ्या प्रमाणात नुकसान.

आशिष साबरे (यवतमाळ जिल्हा प्रतिनिधी) झरी: या वर्षीच्या खरीप हंगामातील सप्टेंबर व ऑक्टोबर या महिन्यापासून आतापर्यंत एकही महिना, एकही पंधरवाडा व आठवडा असा गेला नाही की, त्यामध्ये झरी तालुक्यात अकाली पाऊस पडला नाही.झरी तालुक्यात 28 डिसेंबर रोजी रात्री 9 वाजता दरम्यान अकाली पाऊस, वादळीवारा व गारपीटीने तडाखा दिल्याने तालुक्यातील मंडळातील हजारो हेक्टरवरील पिके नेस्तानाबुत केली.28 डिसेंबर रोजी सायंकाळी 7 वाजता आकाशात अचानक ढगांनी गर्दी केली व वादळीवार्‍यासह पावसास सुरूवात झाली.

या पावसाने एरवी कधी खरा न ठरणारा हवामान खात्याचा अंदाज तंतोतंत खरा ठरविला. हा पाऊस जवळपास रात्रभर सुरू होत. या पावसामुळे तालुक्यातील अनेक भागात शेतातील उभा गहू आडवा झाला तर भाजीपाला व हरभरा पिकांचेही मोठ्या प्रमाणात नुकसान झाल्याने शेतकरी पुन्हा एकदा आर्थिक संकटाच्या खाईत लोटल्या गेला. एकीकडे संपूर्ण देशासह राज्यात कोरोनाच्या भितीने नागरिक भयग्रस्त झाले असून, पुढे काय हेाईल असा प्रश्‍न प्रत्येकाला पडला आहे. तर दुसरीकडे एका आठवड्यात दुसर्‍यांदा अकाली पाऊस व वादळीवार्‍याने हजेरी लावल्याने पिकांचे नुकसान झाले. अचानक आलेल्या वादळीवार्‍यामुळे व पावसामुळे तालुक्यातील काही भागातील बत्ती गुल झाल्याने त्या भागातील नागरिकांना अख्खी रात्र अंधारात काढावी लागली. त्यामुळे स्वाभाविकच नुकसानग्रस्त पिकांचे पंचनामे करून नुकसानभरपाई देण्यात यावी, अशी मागणी तालुक्यातील शेतकर्‍यांकडून केल्या जात आहे.