कार्तिक एकादशी निमित्ताने सद्गुरू संत श्री गदाजी महाराज पालखी मिरवणूक दहीहंडी व महाप्रसाद सोहळा संपन्न

बोरी (गदाजी) येथील गावकऱ्यांनी केले आयोजन

आशिष साबरे (यवतमाळ जिल्हा प्रतिनिधी) मारेगाव: तालुक्यातील ऐतिहासिक आणि सांस्कृतिक  पार्श्वभूमी लाभलेल्या सुप्रसिद्ध अशा बोरी (बु) गावात  आज दिनांक 16 नोव्हेंबर 2021 रोज मंगळवार ला कार्तिक एकादशी निमित्ताने सद्गुरू संत श्री गदाजी महाराज पालखी मिरवणूक दहीहंडी  व महाप्रसाद सोहळा संपन्न झाला. बोरी (बु) हे गाव पंचक्रोशीत 'बोरी गदाजी' आणि 'बोरी गोटमार' या नावाने ओळखले जाते. या गावी सुप्रसिद्ध असे श्री संत गदाजी महाराज यांचे मंदिर आहेत. दरवर्षी होळीनिमित्त या गावी भव्य दिव्य अशा ऐतिहासिक आणि सांस्कृतिक गोटमारीचे आयोजन केल्या जाते,तसेच यात्रा सुद्धा भरविण्यात येते. एकंदरीत गावाला भरभरून ऐतिहासिक आणि सांस्कृतिक वारसा लाभला आहे.

दरवर्षी प्रमाणे याही वर्षी कार्तिक एकादशी निमित्ताने सद्गुरू संत श्री गदाजी महाराज पालखी मिरवणूक दहीहंडी  व महाप्रसाद सोहळ्याचे आयोजन गावकऱ्यांच्या वतीने करण्यात आले. श्री संत गदाजी महाराज यांच्या मंदिराची (गाभाऱ्याची फुलांच्या साहाय्याने सजावट करण्यात आली तसेच सुंदर रांगोळ्या आणि वेगवेगळ्या फुलांच्या माळा या या सजावटीचे प्रमुख आकर्षण होत्या.

भजन करून या महोत्सवाची सुरवात करण्यात आली तसेच गावात पालखी सोहळ्याचे सुद्धा यावेळी आयोजन करण्यात आले होते. संपूर्ण गावभर श्री संत गदाजी महाराज यांची मूर्ती स्थापित असलेल्या पालखीची मिरवणूक मोठ्या थाटात काढण्यात आली. पालखीची छानप्रकरे सजावट सुद्धा करण्यात आली होती. संपूर्ण भक्तांची मांदियाळी यावेळी पालखी भोवताल दिसत होती.भजन मंडळी, गावकरी हे या पालखी मिरवणुकीच्या वेळी श्री संत गदाजी महाराज यांच्या भक्तीत तल्लीन झाले होते. मंदिराचे पुजारी श्री प्रवीण उराडे महाराज यांची उपस्थिती यावेळी आकर्षित करणारी होती. सायंकाळी गावात या महोत्सवाची सांगता महाप्रसादाने करण्यात आली.