अल्पवयीन मुलीचा विनयभंग, आरोपीस अटक..

वणी: शहरातील एका अल्पवयीन मुलीचा विनयभंग केल्या प्रकरणी पोलिसांनी एका आरोपीला अटक केली असून त्याच्यावर पोस्को अंतर्गत गुन्हा दाखल केला आहे. खडबडा मोहल्ला येथे ही घटना मंगळवारी उघडकीस आली असून आरोपी हा देखील या परिसरातील रहिवासी आहे.

याबाबत पोलिसांनी दिलेल्या माहिती नुसार सविस्तर वृत्त असे की १४ वर्षीय अल्पवयीन मुलगी आंघोळी करिता गेली की, आरोपी हा चोरून लपून तिला बघायचा. आरोपी चे नेहमीचे कृत्य तिच्या लक्षात येताच तिने हा प्रकार कुटुंबियांना सांगितला. १ जूनला दुपारी २ वाजता मुलीस आरोपी तिच्याकडे लपून बघत असल्याचे कुटुंबियांच्याही लक्षात आले. परत २ जूनलाही १.३० वाजता असेच कृत्य केल्याचे निदर्शनास आल्यानंतर मुलीच्या पालकांनी मुलीला घेऊन सरळ पोलीस स्टेशन गाठले. खडबडा मोहल्ला येथे राहणारा ३६ वर्षीय युवक हा मुलगी आंघोळ करित असतांना चोरून लपून बघतो, अशी तक्रार पोलीस स्टेशनला नोंदविण्यात आली. २ जूनला रात्री १०.३० वाजताच्या सुमारास ही तक्रार नोंदविण्यात आली.

मुलीच्या तक्रारी वरून पोलिसांनी ३६ वर्षीय या आरोपीस अटक करून त्याच्यावर भादंवि च्या कलम ३५४, ३२३, ५०४ व सहकलम १२ बाल लैंगिक अत्याचार प्रतिबंधक अधिनियम २०१२ अंतर्गत गुन्हा दाखल केला आहे. पुढील तपास ठाणेदार वैभव जाधव यांच्या मार्गदर्शनात एपीआय माया चाटसे करीत आहे.