पिंपळगाव (भोसले) येथे सेवा सहकारी सोसायटी कडून शेतकरी व शासनाची दिशाभूल -क्रिष्णाभाऊ सहारे 

सोसायटी अध्यक्ष व सचिवावर कारवाई करा  -उपविभागीय अधिकारी यांना निवेदन 

ब्रम्हपुरी: धान खरेदी करतांना सर्वप्रथम बाजार समितीने दिलेल्या टोकन नुसार शेतकऱ्यांनी शासनाच्या अधिकृत पोर्टल वर शासनाने ठरवून दिलेल्या कालावधी मध्ये खरेदी केंद्रावर  जाऊन ऑनलाईन नोंदणी करणे गरजेचे आहे. नोंदणीकृत शेतकऱ्यांनाच धान खरेदीसाठी खरेदी केंद्रामार्फत एसएमएस देऊन धान्य खरेदीसाठी तारीख दिली जाते, व त्यानुसार खरेदी केंद्रावर शेतकऱ्यांकडून धानाची खरेदी करून ऑनलाईन लॉट एंट्री केल्या जाते.

मात्र तालुक्यात कुठेही आधारभूत रब्बी धान खरेदी केंद्र चालू नसतांना पिंपळगाव सेवा सहकारी सोसायटी अंतर्गत येणाऱ्या 9 गावामधून फक्त पिंपळगावातीलच 75 शेतकऱ्यांकडून 3197.20 क्विंटल रब्बी आधारभूत धान खरेदी करून हितसंबंध जोपासात  सेवा सहकारी सोसायटी पिंपळगाव (भोसले) येथील अध्यक्ष व सचिव यांनी शासनाची व शेतकऱ्यांची दिशाभूल केल्याचे प्रकार उघडकीस आलेला आहे.

ईतर आठ गावे ज्यात सोंद्री, लाडज, चिखलगाव, चिंचोली, सुरबोडी, सोनेगाव सावलगाव, हरदोली हे सर्व गावे पिंपळगाव (भोसले) सेवा सहकारी सोसायटी अंतर्गत येत असतांना फक्त पिंपळगाव येथील शेतकऱ्यांचे धान खरेदी झाली असल्याने उर्वरित आठ गावातील शेतकऱ्यांना सोसायटी कडून रब्बी धानाच्या खरेदी बाबत कोणत्याही प्रकारची माहिती न देता, सोसायटीचे सचिव व अध्यक्ष यांनी मनमानी कारभार करून शासनाची दिशाभूल करत, शेतकऱ्यांच्या जीविताशी खेळून अक्षम्य गुन्हा केलेला आहे, करिता उपविभागीय अधिकारी ब्रम्हपुरी यांना निवेदन देत संबंधित खरेदीवर चौकशी करून कारवाई करण्यात यावी अशी मागणी निवेदनाद्वारे करण्यात आली तर निवेदनाची प्रतिलिपी खासदार श्री अशोक नेते, आमदार श्री बंटीभाऊ भांगडिया व जिल्हाधिकारी चंद्रपूर यांना पाठविण्यात आले.

निवेदन देतांना श्री क्रिष्णाभाऊ सहारे माजी जिल्हा परिषद उपाध्यक्ष चंद्रपूर व जिल्हा परिषद सदस्य, श्री विलास उरकुडे माजी पंचायत समिती उपसभापती, सुधीर दोनाडकर, टिकाराम ढोरे,विनोद दोनाडकर, बाळकृष्ण शेंडे,हरिभाऊ शेबे, गजानन ढोरे,हेमराज कामडी, संतोष आडकीने,विलास कुथे, प्रमोद टिकले, विनोद कुथे उपस्थित होते.