मोदींच्या काठी अन्‌ घोंगडं सत्कारावरून धनगर समाजात नाराजी,सोशल मीडियावर टीकेची झोड

भाजपच्या निवडणूक स्ट्रॅटेजीनुसार माढा च्या सभेत मोदींचा पिवळा फेटा बांधून काठी अन्‌ घोंगडं देऊन सत्कार करण्यात आला

मुंबई : पंतप्रधान नरेंद्र मोदी यांचा काठी अन् घोंगडं देऊन सत्कार केल्याने धनगर समाजात मोठ्या प्रमाणात नाराजी पसरली असून मोदींच्या ह्याच फोटोवर सोशल मीडियावर मोठ्या प्रमाणात टीका होत आहे.

देशात लोकसभा निवडणुकीचे वारे वाहत आहेत त्यामुळे सर्विकडे प्रचार जोरदार पद्धतीने सुरू आहे.महाराष्ट्रात देखील प्रचाराचे वारे जोरदार वाहत आहे. या प्रचारात पंतप्रधान नरेंद्र मोदी देखील उतरले असून ठिकठिकाणी मोदींच्या सभा होत आहेत. माढा लोकसभा मतदारसंघात भाजप उमेदवाराच्या  प्रचारासाठी पंतप्रधान नरेंद्र मोदी यांची मंगळवारी (ता. 30 एप्रिल) माळशिरसमध्ये सभा झाली. भाजपच्या निवडणूक स्ट्रॅटेजीनुसार या सभेत मोदींचा पिवळा फेटा बांधून काठी अन्‌ घोंगडं देऊन सत्कार करण्यात आला. माढा लोकसभा मतदारसंघातील धनगर समाजाची निर्णायक मतदारसंख्या डोळ्यासमोर ठेवूनच भाजपने पंतप्रधानांचा धनगरी वेशभूषा देऊन सत्कार केल्याचे उघड वास्तव आहे. परंतु धनगरी वेशभूषेत मोदींचा सत्कार केल्याने समाजामधील नाराजी उफाळून आली आहे. सोशल मीडियावर मोदींचा हाच काठी आणि घोंगडी घातलेला फोटोवर समाजबांधवांनी जोरदार टीका केली आहे.त्याचे कारण आहे धनगर आरक्षण मुद्दा, २०१४ साली सोलापूर येथे सभा झाली होती आणि त्या सभेमध्ये देखील अशीच काठी आणि घोंगडी दिले होते त्याप्रसंगी देशाचे पंतप्रधान नरेंद्र मोदी म्हणाले होते की "मै जल्दी धनगर आरक्षण के मुद्दे को लेकर, धनगर समाज को एसटी अनुसूचित जमाती का आरक्षण दूंगा" परंतु  दहा वर्षे उलटून गेले तरीही धनगर  समाजाला आरक्षण मिळाले नाही. त्यामुळे आता मोदींचा पुन्हा असाच सत्कार झाल्याने धनगर समाज संतप्त झाला असून त्यांनी मोदींचा काठी आणि घोंगडी या फोटोवर सोशल मीडियावर टीका करून आरक्षणाचे काय झाले असा सवाल मोदींना केला आहे.त्याच बरोबर धनगरांची फसवणूक केल्याचे अनेकांनी मत मांडले आहे. त्यामुळें माळशिरसमध्ये झालेली मोदींची सभा महायुतीला टोकेदुखी ठरण्याची चिन्ह दिसत आहे.