हरवलं आता गणगोतं..

हरवलं आता गणगोतं..

भाऊ गेला बाप गेला
गेली हो कुणाची आई,
होते सारे व्हेंटीलेटरवर
शिल्लक आॕक्सिजन नाही..//१//

कसली ही महामारी
देवा कळनाचं काही,
हरवलं आता गणगोतं
माझी रडतीयं ताई..//२//

दोष कुणा देऊ सांग
रोज सरण वाट पाही,
घेऊ कसा श्वासं मोकळा
टाहो फोडती दिशा दाही..//३//

मरण झालं स्वस्त आता
जगण्याचा भाव झाला लई,
पैशाबिगर गरीबानं देवा
कशी टोचुन घ्यावी सुई..//४//

डोळ्यादेखत पेटतं सरण
जणु आता मरणाची घाई,
अंगण रोज बांधतं तिरडी
कोण गायील रं अंगाई..//५//

गुदमरुन गेला श्वास आता
दिनरात आसवं इथं वाही,
गळती होते आॕक्सिजनची
जगण्याची देईल कोण ग्वाही..//६//

नको मदत आम्हा लाखांची
लाख मोलाची माणसंच नाही राहिली,
घराच्या देव्हार्‍यात आता
नाही आमचे विठ्ठल रखुमाई..//७//

आई आमची विठ्ठल रखुमाई....