गोवामुक्ती आंदोलनातील स्वातंत्र्यसैनिक असलेल्या जयानंद मठकर यांचे आज बेळगाव येथे निधन

गोवामुक्ती आंदोलनातील स्वातंत्र्यसैनिक असलेल्या जयानंद मठकर यांचे आज बेळगाव येथे निधन

भारतीय वार्ता (प्रतिनिधी):   कोकणातील समाजवादी चळवळीचे आधारवड असलेले ज्येष्ठ सामाजिक कार्यकर्ते, ’वैनतेय’ या साप्ताहिकाचे संपादक  व गोवामुक्ती आंदोलनातील स्वातंत्र्यसैनिक असलेल्या जयानंद मठकर यांचे आज बेळगाव येथे के०एल०ई० हॉस्पिटलमध्ये निधन झाले. नाथ पै, मधु दंडवते यांचा सच्चा राजकीय वारसदार असलेले जयानंदजी मठकर एका अर्थी समाजवाद्यांच्या या एके काळच्या बालेकिल्ल्यातील अखेरचे शिलेदार असं म्हटलं तर वावगं ठरू नये.  
         राजकारणापेक्षाही समाजकारणात जास्त रस असलेला, राजकारणात वावरूनही विचार आणि विवेक यांच्यावरील निष्ठा ढळू न देणारा आणि कोकणातील सामान्य माणसांच्या जगण्यातील संघर्षाचे पक्के भान असलेला जनसामान्यांचा नेता अशीच त्यांची प्रतिमा होती. गेल्या जवळपास सात दशकांच्या संघर्षमय कालखंडाचा साक्षीदार असलेल्या मठकरांनी ग्रंथालय चळवळ, असंघटित कामगारांचे, मच्छीमारांचे शेतमजूरांचे प्रश्न, कोकण रेल्वे, पाणी प्रश्न अशा अनेक विषयांवर लेखन केले आहे. बॅ० नाथ पैंचे त्यांनी लिहिलेले चरित्र साहित्य संस्कृती मंडळाने प्रकाशित केले आहे. या शिवायही विविध विषयांवरच्या वैचारिक पुस्तिकांचे लेखन त्यांनी केले आहे. मे० द० शिरोडकरांनी ९२ वर्षांपूर्वी स्थापन केलेल्या साप्ताहिक वैनतेयचे गेले जवळपास अर्ध दशक ते संपादन करीत होते. ( याच वैनतेयमधून ज्येष्ठ लेखक वि० स० खांडेकर यांचे ’गाढवाची गीता’ हे ललित लेखन सदर स्वरूपात प्रकाशित झाले होते. हे मराठीतले पहिले ललित निबंध मानले जातात. कवी आरती प्रभू यांच्याही प्रारंभीच्या विद्यार्थी दशेतील कविता या अंकांतून प्रकाशित झाल्या होत्या.) 
परिवर्तनाचा दिवा हाती घेऊन वाटचाल करणारा आणि आमच्या सारख्या खेड्यापाड्यातल्या, बहुजन समाजातल्या असंख्य पोरांना उजेडाची लख्ख वाट दाखवणारा आणखी एक कार्यकर्ता कसलाही गाजावाजा न करता निघून गेला आहे. 
असंख्य अनाम कार्यकर्त्यांसारखेच कसलेही सत्तेचे पद न उपभोगलेला, कुठल्याही चॅनलने, राज्य पातळीवरील वर्तमान पत्रांनी दखल न घेतलेला एक साथी आपल्यातून निघून गेला आहे. कोकणात कधी काळी लुकलुकणारा समाजवादी विचारांचा दिवा आणखीनच शीण झाला आहे, एव्हढंच आता राहून राहून मनात येत राहील. 
(Photo: सावंतवाडीतील कॉ० अण्णा भाऊ साठे साहित्य संमेलनात पुस्तके खरेदी करतांना जयानंद मठकर. सोबत कॉ० पानसरे, सतीश काळसेकर, नगराध्यक्ष साळगावकर इ० मठकरांनी कॉ० पानसरेंच्या ’शिवाजी कोण होता’च्या शंभर प्रती खरेदी करून राष्ट्र सेवा दलाच्या शिबिरात मुलांना वाटल्या होत्या.