मत्स्यव्यवसाय विभागाकडुन तालुकास्तरावर किसान क्रेडिट कार्ड मेळाव्याचे आयोजन

 मच्छीमारांच्या आर्थिक प्रगतीकरिता किसान क्रेडिट कार्ड योजना

चंद्रपूर दि. 26 नोव्हेंबर: केंद्र शासनाकडून सामान्य मच्छीमारांच्या आर्थिक प्रगतीकरिता किसान क्रेडिट कार्ड योजना राबविण्याचा निर्णय शासनस्तरावरून घेण्यात आला आहे. या कल्याणकारी योजनेच्या माध्यमातून चंद्रपूर जिल्ह्यातील मच्छिमार तसेच खाजगी मत्स्यसंवर्धक यांना मत्स्यव्यवसायाकरिता लागणारे आवश्यक भांडवली साहित्य जसे की, मासेमारीकरिता वापरण्यात येणारी सामुग्री, मत्स्यबीज, मत्स्यखाद्य, खते आदी साहित्य खरेदीकरिता किसान क्रेडिट कार्डच्या माध्यमातून सहज भांडवल उभारणे शक्य होऊ शकेल. त्याकरिता इच्छुक मत्स्यसंवर्धकांनी त्यांचे स्वतःचे खाते असलेले राष्ट्रीयीकृत बँक अथवा सहकारी बँकेशी संपर्क साधून बँकेला अर्ज सादर करावा.

किसान क्रेडिट कार्डचा लाभ देण्याकरिता जिल्ह्यातील विविध बँका व मत्स्यव्यवसाय विभागाच्या समन्वयाने तालुकास्तरावर किसान क्रेडिट कार्ड मेळाव्याचे आयोजन करण्यात येत आहे. सदर मेळाव्यात इच्छुकांकडून थेट अर्ज भरून घेण्यात येणार आहे. तरी, इच्छुक मत्स्यसंवर्धक, मच्छिमार, मत्स्यपालन सहकारी संस्था, बचतगट यांनी किसान क्रेडिट कार्ड मिळवण्यासाठी आधारकार्ड, पॅनकार्ड, शेतीचा सातबारा, तलाव, जलाशय करारपत्र व इतर आवश्यक  कागदपत्रे घेऊन मेळाव्यात उपस्थित रहावे.

सदर मेळाव्याचे आयोजन नागभीड येथे दि.3 डिसेंबर 2021 रोजी सकाळी 10 वाजता, पंचायत समिती नागभीड, दि. 10 डिसेंबर रोजी  पंचायत समिती, बल्लारपूर, दि. 17 डिसेंबर रोजी पंचायत समिती पोंभूर्णा तर दुपारी 2 वाजता गोंडपिंपरी, दि. 24 डिसेंबर रोजी पंचायत समिती, सावली तर दुपारी 2 वाजता पंचायत समिती मुल, दि.31 डिसेंबर 2021 रोजी जिल्हा परिषद शाळा सिदेंवाही, दि. 7 जानेवारी 2022 रोजी पंचायत समिती चिमूर, दि. 14 जानेवारी 2022 रोजी पंचायत समिती गडचांदूर तर दि. 21 जानेवारी 2022 रोजी सकाळी 10 वाजता पंचायत समिती ब्रह्मपुरी येथे आयोजित केले जाणार आहे.

किसान क्रेडिट कार्ड मार्फत कर्ज प्राप्त करण्यासाठी बँकेच्या विहित अटी व शर्तींची पूर्तता करून लाभार्थी मत्स्यसंवर्धकास योजनेचा लाभ घेता येईल. तरी, चंद्रपूर जिल्ह्यातील जास्तीत जास्त मत्स्यसंवर्धक, मच्छिमार, मत्स्यपालन सहकारी संस्था, बचतगट यांनी केंद्र शासनाच्या कल्याणकारी किसान क्रेडिट कार्ड योजनेचा लाभ घेऊन आपल्या व्यवसायामध्ये भांडवली खर्चाची व्यवस्था करण्याबाबतचे आवाहन मत्स्यव्यवसाय विभागाचे सहाय्यक आयुक्त श्री. बळकटे यांनी केले आहे.