गोंडबुरांडा येथे कीटकनाशक पिऊन शेतकऱ्याची आत्महत्या

दुबार पेरणीचे संकट व कर्जबाजारी झाल्याने घेतला आत्महत्येचा निर्णय

मारेगाव: मारेगाव तालुक्यातील गोंडबुरांडा येथील शेतकऱ्याने विषारी कीटकनाशक पिऊन आत्महत्या केली.आज सकाळी ११ ते ११.३० वाजताच्या सुमारास ही दुःखद घटना घडली.दिनकर पुंडलिक बोन्दरे (वय ५५) असे आत्महत्या केलेल्या शेतकऱ्याचे नाव आहे.

दिनकर बोन्दरे हे गोंडबुरांडा येथील जन्मापासून रहिवासी होते. त्यांच्याकडे १५ एकर शेती होती. यावर्षी मोठ्या आशेने त्यानी शेताची मशागत करून पेरणी केली होती परंतु यावर्षी पावसाने दगा दिल्याने त्यांच्यावर दुबार पेरणीचे संकट आले होते. त्यामुळे त्यांनी खाजगी सावकारांचे कर्ज घेतले होते.; कर्जाचा बोझा पहाडा एवढा मोठा झाल्याने अखेर कर्जाला कंटाळून त्यांनी स्वतःच्या घरी सकाळी ११ ते ११.३० वाजताच्या सुमारास मोनोसील हे कीटकनाशक प्राशन केले.

कीटकनाशक घेतल्याचे कळताच त्यांच्या कुटुंबियांनी त्यांना मारेगाव येथील ग्रामीण रुग्णालयात उपचारासाठी दाखल केले. मात्र डॉक्टरांनी त्यांना मृत घोषित केले. दिनकर बोन्दरे हे स्वभावाने छान व्यक्तिमत्त्व होते. ते मोठ्या गुण्यागोविंदाने गावात आपला प्रपंच चालवीत होते.त्यांच्या अशा अकाली जाण्याने संपुर्ण गावात हळहळ व्यक्त केली जात आहे. त्यांच्या पश्चात म्हातारी आई, पत्नी, आणि दोन मुले असा आप्त परिवार आहे.

आत्महत्या ग्रस्त यवतमाळ जिल्ह्यातील मारेगाव तालुका हा आत्महत्या ग्रस्त तालुका म्हणून कुप्रसिद्ध आहे. आठवड्यात  किमान २ ते ३ आत्महत्या सतत होत असतात. मात्र अद्याप ही बाब ना लोकप्रतिनिधींनी गांभीर्याने घेतली ना प्रशासनाने.