जन्मोत्सव चार दिवसांवर येऊनही जिजाऊंच्या जन्मस्थळाला अजूनही कुलूप

पुरातत्व विभागाचा अनागोंदी कारभार चव्हाट्यावर

बुलढाणा :  -  चार दिवासांवर आलेल्या राजमाता जिजाऊ जन्म उत्सवासाठी महाराष्ट्राची अस्मिता असलेला बुलढाणा जिल्ह्यातील सिंदखेडराजा येथील राजमाता जिजाऊंचा जन्मस्थळ असलेला राजवाडा अजूनही कुलूप बंदच आहे. सरकारने मंदिरे, आध्यात्मिक स्थळे, पर्यटन स्थळ पर्यटकांसाठी उघडली आहेत. मात्र, कोरोनाच्या नावाने बंद केलेली ऐतिहासिक स्थळ अजूनही बंदच असल्याने पर्यटकांचा हिरमोड होत आहे. त्यामुळे पुरातत्व विभागाचा अनागोंदी कारभार पुन्हा एकदा चव्हाट्यावर आला आहे.

येत्या १२ तारखेला राजमाता जिजाऊंचा जन्मोत्सव आहे. परंतु जिजाऊंचे जन्मस्थळ हे अजूनही अंधारात आणि कुलुपबंद स्थितीत आहे.  सध्या हा राजवाडा पुरातत्व विभागाच्या देखरेखीत आहे. पण जिजाऊंच्या जन्म सोहळ्यासाठी या परिसराची साधी साफसफाई किंवा एखादा दिवा सुद्धा लावण्याचे काम पुरातत्व विभागाने केलेले नाही. मुळ जन्मस्थळ अंधारात अशी काहीशी स्थिति रात्री बघवायास मिळाली आहे. याबाबतीत पुरातत्व उपसंचालक नागपूर कार्यलयात चौकशी केली असता उपसंचालक सुटीवर असल्याचे सांगण्यात आले. या भागाचा पदभार नाशिक पुरातत्व विभागाचे उपसंचालक यांच्याकडे असल्याची माहिती मिळाली आहे.
जिजाऊ मॉंसाहेबांचा जन्म भुईकोट राजवाड्यामध्ये १२ जानेवारी १५९८ साली झाला. आकर्षक भव्य प्रवेशद्वार असणारा हा राजवाडा सिंदखेड राजा नगरीमध्ये मुंबई-नागपूर हायवेला लागूनच आहे. याच वास्तूसमोर नगर पालिका निर्मित एक बगिचा देखील आहे. येथे राजे लखुजीराव जाधवांचे समाधीस्थळ आहे.