अपूर्ण नाली बांधकामामुळे गटारातील पाणी विहिरीत

अपूर्ण नाली बांधकामामुळे गटारातील पाणी विहिरीत

सिंदेवाही: नगर पंचायत सिंदेवाही च्या सदोष नाली बांधकामाचा फटका शिंदेवाही नगरमध्ये अनेक लोकांना बसत आहे. अनेक तक्रारी नगरपंचायत कडे दाखल केले जात आहे. सिद्धार्थ चौकात अपूर्ण नाली बांधकामामुळे गटारातील पाणी विहिरीमध्ये शिरले असून विहिरीतील पाणी पूर्णपणे प्रदूषित झालेले आहे. याशिवाय परिसरात गटारांमध्ये पाणी साचलेला आहे.

सिद्धार्थ चौकात नाली बांधकामाला सुरुवात करण्यात आली. काही जागृत लोकांच्या तक्रारीमुळे नाली बांधकाम थांबविण्यात आले. फेब्रुवारी महिन्यात खोदलेले नाली बांधकाम अजून पर्यंत पूर्ण केलेले नाही. सध्या पावसाळ्याचे दिवस असल्यामुळे नालीमध्ये ठिकाणी पावसाचे पाणी साचलेले आहे. नालीमध्ये साचलेले पाणी जवळ बसलेल्या विहिरीमध्ये उतरत असल्यामुळे सिद्धार्थ चौकातील सुदामराव  खोबरागडे यांच्या घरच्या विहिरीतील पाणी पूर्णपणे प्रदूषित झालेले आहे. बांधकाम पूर्ण करण्यासाठी नगरपंचायत सिंदेवाही यांच्याकडे अनेकदा विनंती करून सुद्धा विनंतीला केराची टोपली दाखवण्यात आली. नगरपंचायतीच्या लाल फितीचा फटका सिंदेवाही नगरातील नागरिकांना बसत आहे. सदर अपूर्ण नाली बांधकाम लवकर पूर्ण करण्यात यावे अशी मागणी करण्यात येत आहे.