अफवांवर विश्वास ठेवू नका; कोरोना लसीकरणाला सहकार्य करा

महापौर राखी संजय कंचर्लावार यांचे मुस्लिम मौलवी, मशीद पदाधिकाऱ्यांना आवाहन

चंद्रपूर, ता. १५ : चंद्रपूर शहरातील १८ वर्षापेक्षा जास्त वयोगटातील ८० टक्के व्यक्तींनी कोरोना लसीची पहिली मात्रा घेतली. मात्र, काही भागात अद्यापही टक्केवारी कमी आहे. कोरोनाची संभाव्य तिसरी लाट रोखून धरण्यासाठी अफवांवर विश्वास न ठेवता कोरोना लसीकरणाला सहकार्य करा, असे आवाहन महापौर राखी संजय कंचर्लावार यांनी केले.

महानगरपालिकेने शहरातील लसीकरणाचा टक्का वाढविण्यासाठी राणी हिराई सभागृहात सोमवारी (ता. १५) मुस्लिम मौलवी, मशीद पदाधिकाऱ्यांची बैठक घेतली. यावेळी अतिरिक्त आयुक्त विपीन पालीवाल, उपायुक्त अशोक गराटे, सहाय्यक आयुक्त विद्या पाटील, मुख्य वैद्यकीय अधिकारी डॉ. वनिता गर्गेलवार यांची उपस्थिती होती.

ज्यांनी कोवीड लस सध्या घेतली नाही, अशा सर्व मुस्लिम बांधवासाठी विशेष लसीकरण शिबीर घेण्यात येईल. त्या ठिकाणी जाऊन लसीकरणाचे डोस घ्यावे व कोरोनापासून आपले तसेच आपल्या परिवाराचे जीवन सुरक्षित करावे, असे आवाहन महापौर राखी संजय कंचर्लावार यांनी केले. मौलाना, धर्मगुरू, तसेच समाजातील डॉक्टर, सामाजिक संघटनांच्या पदाधिकाऱ्यांनी लसीकरणाबाबत लोकांच्या मनामध्ये असणारे गैरसमज दूर करून लोकांना लसीकरणाचा लाभ घेण्यासाठी प्रवृत्त करावे, असे आवाहनदेखील केले.