प्रकल्पग्रस्त शेतकऱ्यांच्या कुटुंबातील व्यक्तिला नौकरीत सामावून घेण्याची मागणी..!

आशिष साबरे (यवतमाळ जिल्हा प्रतिनिधी) झरी:- आशिया खंडातील सर्वात मोठी सिमेंट फॅक्टरी आरसीसीपीएल ही एम पी बिर्ला च्या नावावर सुरू होण्याच्या मार्गावर आहे. सिमेंट फॅक्टरी सुरू होण्यापूर्वी शेतकऱ्यांना विविध प्रलोभने देऊन कवडीमोल भावात शेतीची खरेदी केली. कंपनीचे बांधकाम जवळ जवळ दोन वर्षांपासून सुरू असून मार्च २०२२ पर्यंत कम्पनी सुरू होण्याच्या मार्गावर आली असून आतापर्यंत प्रकल्पग्रस्त शेतकऱ्यांच्या मुलांना किंवा त्यांच्या एकही नातेवाईकाना कंपनीत नौकरिवर घेण्यात आले नाही. याबाबत कंपनीला अनेकदा निवेदने देऊन सुद्धा एकही मुलाला नौकरीवर सामावून घेण्यात आले नाही. अखेर त्रस्त शेतकरी यांनी कंपनीच्या मुख्य गेटवर धरणे आंदोलन करण्याचा निर्णय घेतला व त्याबाबत जिल्हाधिकारी, कंपनीसह इतर सर्व अधिकारी यांना निवेदन देऊन ३० डिसेंबर पासून धरणे आंदोलनास सुरवात करण्यात आली.

कंपनीत प्रकल्पग्रस्त शेतकऱ्यांच्या मुलांना नौकरीवर सामावून घेण्याबाबत अनेकदा बैठका घेण्यात आल्या व निवेदने देण्यात आली परंतु कंपनी कडुन कोणताही तोडगा न निघाल्यामुळे तसेच कंपनीला दिलेल्या निवेदनाचे उत्तर लेखी स्वरुपात न कळविल्यामुळे व कोणतीही कार्यवाही न केल्यामुळे शेतकऱ्यांमध्ये कंपनी विषयी रोष निर्माण झाला. कंपनीला ७ दिवसाचा अल्टीमेंटम देण्यात आला होता. कंपनीने ७ दिवस होऊन सुध्दा प्रकल्पग्रस्त शेतकऱ्यांना आज पर्यंत लेखी स्वरुपात काहीच कळविले नाही तसेच मागील ४ महिन्याच्या कालावधीत कंपनीला निवेदन देऊन व अधिकाऱ्यांसोबत चर्चा करून प्रकल्पग्रस्त शेतकऱ्यांच्या मुलांविषयी नौकरी बाबत कोणताही तोडगा न निघाल्यामुळे सर्व प्रकल्पग्रस्त शेतकऱ्यांनी ३० डिसेंबर पासून धरणे आंदोलनाला सुरवात केली आहे. शेतकऱ्यांच्या मागण्या मान्य होत पर्यंत धरणे आंदोलन सुरु राहणार आहे त्यात तोडगा न निघाल्यास बेमुदत उपोषण व वेळ प्रसंगी आमरण उपोषण करण्याचा इशारा दिनेश बर्लावार,गणपत बच्चेवार,मनोज अकीनवार,गोपाल एनगंधेवार, राजेश बोलीवार,संभा पारशिवे, अनिल दुर्लवार, पुरुषोत्तम खीरटकर, गजानन बच्चेवार,भुदेवी चेलपेलवार,खलील खा पठाण,मोरेश्वर कोलमपेल्लीवार,राजेश डब्बावार, सुमित अकीनवार,आकाश कोलमपेल्लीवार,ऋषिकेश पुल्लीवार, सह सर्व शेतकऱ्यांनी दिला.