पेट्रोल दरवाढीवर दिल्ली सरकारचा रामबाण उपाय ।। किमती थेट ८ रुपयांनी आल्या खाल..!

सौजन्य : लोकसत्ता

एकीकडे देशभरात पेट्रोल-डिझेलच्या वाढत्या किमतींमुळे सामान्यांचं आर्थिक गणित कोलमडलं असताना राजधानी दिल्लीमध्ये मात्र आज पेट्रोलच्या किमती थेट ८ रुपये प्रतिलिटर इतक्या कमी झाल्या. त्यामुळे देशभरातील नागरिकांना जरी पेट्रोलच्या शंभरीपार गेलेल्या दरांचा फटका सहन करावा लागत असला, तरी दिल्लीकर मात्र दिल्ली सरकारच्या एका निर्णयामुळे खूश झाले आहेत. त्यामुळे आता इतर राज्यातील जनता देखील त्या त्या राज्य सरकारने अशाच प्रकारचा निर्णय घ्यावा, अशी मागणी करू लागली आहे.

दिल्ली सरकारने आज महत्त्वपूर्ण निर्णय घेऊन एका रात्रीत पेट्रोलचे दर ८ रुपये प्रतिलिटर कमी करण्याची घोषणा केली आहे.

कसे बदलले दिल्लीतले पेट्रोलचे दर?

राजधानी दिल्लीमध्ये सध्या पेट्रोल १०३.९७ रुपये प्रतिलिटर तर डिझेल ८६.६७ रुपये प्रतिलिटर इतक्या दराने विकले जात आहे. तर मुंबईत हेच दर अनुक्रमे १०९.९८ रुपये आणि ९४.१४ रुपये प्रतिलिटर इतके आहेत. या पार्श्वभूमीवर आज मध्यरात्रीपासून दिल्लीमध्ये पेट्रोल ८ रुपयांनी स्वस्त म्हणजेच ९५.९७ रुपये प्रतिलिटल या दराने मिळणार आहे. त्यामळे देशभर दिल्ली सरकारच्या निर्णयाची चर्चा सुरू झाली आहे.