पालकमंत्र्यांच्या हस्ते आज अत्याधुनिक तीन फिरत्या दवाखान्याचे लोकार्पण

पालकमंत्र्यांच्या हस्ते आज अत्याधुनिक तीन फिरत्या दवाखान्याचे लोकार्पण

चंद्रपूर दि. 16 सप्टेंबर : ग्रामीण भागातील नागरिकांना आरोग्याच्या सुविधा मिळाव्यात, दुर्गम भागातील तसेच तालुक्याच्या ठिकाणी ये-जा न करू शकणाऱ्या रुग्णांना वेळेत उपचार मिळावेत यासाठी जिल्ह्याचे पालकमंत्री विजय वडेट्टीवार यांच्या हस्ते शुक्रवार दि. 17 सप्टेंबर 2021 रोजी शासकीय विश्रामगृह, ब्रह्मपुरी येथे अत्याधुनिक फिरते दवाखान्याचे लोकार्पण होत आहे. जिल्हाधिकारी अजय गुल्हाने, मुख्य कार्यकारी अधिकारी डॉ. मिताली सेठी, जिल्हा पोलिस अधीक्षक अरविंद  साळवे यांच्या उपस्थितीत हा लोकार्पण सोहळा संपन्न होणार आहे.

पालकमंत्री विजय वडेट्टीवार यांच्या प्रयत्नातून आयसीआयसीआय फाउंडेशनतर्फे जिल्ह्यासाठी अत्याधुनिक तंत्रज्ञान व प्राथमिक उपचारासाठी सुसज्ज व सर्व सुविधा असे तीन फिरते दवाखाने उपलब्ध करून देण्यात आले आहे. या फिरत्या दवाखान्यामध्ये अत्याधुनिक उपकरणे, औषधी तसेच डॉक्टर उपलब्ध असणार आहेत.

भारतात प्रथमच मोबाईल ट्रॅकिंग सिस्टिम व डॉक्टर पेशंट ॲप टेक्नॉलॉजीने सदर फिरता  दवाखाना परिपूर्ण असणार आहे. या फिरत्या दवाखान्याचे वैशिष्ट्य म्हणजे नागरिकांना मोफत औषधे, मोफत आरोग्य तपासणी, मोफत डायबिटीस व ब्लड प्रेशर तपासणी, मोफत प्राथमिक औषधोपार अँड ड्रेसिंग त्यासोबतच कोविड काळात मोफत कोरोना टेस्टिंग उपलब्ध असणार आहे. या फिरत्या दवाखान्याच्या माध्यमातून जिल्ह्यातील सर्व तालुक्यातील ग्रामीण व दुर्गम भागांमध्ये नागरिकांना आरोग्य सेवा उपलब्ध होणार आहे. नागरिकांनी  आपल्या अँड्रॉइड मोबाईलमध्ये पेशंट ॲप डाऊनलोड करावे व या सुविधेचा लाभ घ्यावा, असे  कळविण्यात आले आहे.