संपूर्ण महाराष्ट्रात ओला दुष्काळ जाहीर करा - संभाजी ब्रिगेड

सरकारने मोडले सोयाबीन उत्पादक शेतकऱ्यांचे कंबरडे - चंद्रकांत वैद्य

चंद्रपूर (जिल्हा-प्रतिनिधी):- संपुर्ण राज्यात झालेल्या अतिवृष्टीमुळे शेतकऱ्यांच्या हातात आलेल्या पिकांचे नुकसान झाले आहे. परिणामी राज्यातील शेतकरी देशोधडीला लागण्याची स्थिती निर्माण झाली आहे. शासनाने ओला दुष्काळ जाहीर करून शेतकऱ्यांच्या खात्यात सरसकट ५० हजार रुपयांची मदत वर्ग करण्याची मागणी संभाजी ब्रिगेडने जिल्हाधिकारी यांचे मार्फत मुख्यमंत्र्यांना दिलेल्या निवेदनातून केली आहे.अन्यथा संभाजी ब्रिगेड चंद्रपूर ने तीव्र आंदोलन करण्याचा इशारा देण्यात आला आहे.

 हवामान खात्याचा अंदाज चुकवत दरवर्षीच्या तुलनेत यंदा पाऊस कमालीचा पडला आहे. त्यात सप्टेंबरमध्ये पाऊस तसा अत्यल्प पडतो. पण यावर्षी सप्टेंबरमध्ये कमालीचा पाऊस पडला आहे. परिणामी शेतकऱ्यांच्या शेतातील सोयाबीन, कपाशी,तूर यासारख्या पिकांचे अतोनात नुकसान झाले आहे. कित्येक शेतकऱ्यांच्या शेतात उभे असलेल्या सोयाबीन ला तर कोंब फुटले आहे. तर काही शेतातील सोयाबीन जमिनीवर पडले असल्याचे स्पष्ट चित्र ही बघायला मिळते आहे. कपाशीचे जोमात आले होते.बोंडे सुद्धा लागली होती.परंतु सततच्या पावसाने बोंडे सुद्धा करपली आहेत. परिणामी निसर्गाच्या आपत्तीमुळे घरात पीक येण्यापूर्वीच उध्वस्त झाले आहे. या महिन्यात पडलेल्या पावसाने शेतकरी हवालदिल झाला आहे. शासनाने वणी उपविभागासह संपूर्ण महाराष्ट्रात ओला दुष्काळ जाहीर करून शेतकऱ्यांच्या खात्यावर सरसकट ५० हजार रुपये मदत तात्काळ वर्ग करण्याच्या मागणीचे निवेदन संभाजी ब्रिगेड पक्षाचे प्रदेश उपाध्यक्ष चंद्रकांत वैद्य, महानगराध्यक्ष अँड मनीष काळे, जिल्हा कार्याध्यक्ष डॉ. सचिन बोधाने, जिल्हासचिव गजानन नागपुरे, प्रसिद्धी प्रमुख इंजि. प्रकाश पिंपळकर आदींनी निवासी उप जिल्हाअधिकारी यांचे मार्फत मुख्यमंत्र्यांना दिलेल्या निवेदनातून केली आहे. अन्यथा संभाजी ब्रिगेड पक्षाच्या वतीने  तीव्र आंदोलन करण्याचा इशारा देण्यात आला आहे.

यावर्षी शेतकऱ्यांच्या शेतात सोयाबीनचे पीक डोलायला लागले होते. तसाच बाजारपेठेत सोयाबीनचे दर प्रतिक्विंटल १० हजार रुपयांच्या घरात गेले होते. जसा हंगाम सुरू झाला तसे केंद्र सरकारने सोयाबीनपेंड आयात केली.आणि सोयाबीनचे दर निम्यावर आले. एकीकडे अस्मानी संकट तर दुसरीकडे सुलतानी संकट अशा कचाट्यात शेतकरी अडकला आहे. आणि केंद्र सरकार शेतकऱ्यांच्या जणू जीवावरच उठल्याचे आयात धोरणावरून स्पष्ट होत आहे. आता झालेल्या अतिवृष्टीमुळे सोयाबीन, कापूस उत्पादक शेतकरी, पुरता हवालदिल झाला आहे.