बलात्कार करणाऱ्या आरोपिला फाशिची शिक्षा द्या..!

अकोला (प्रतिनिधी): सातारा जिल्ह्याच्या पाटण तालुक्यातील ढेबावाडी येथे नराधम आरोपीने 7 वर्षाच्या चिमुकलीच्या शरीराचे लचके तोडून तिची निर्घृण हत्या केल्याची धक्कादायक घटना समोर आली आहे. क्रूरतेचा कळस गाठणाऱ्या या घटनेने माणुसकीला काळिमा फासला गेला आहे.

रात्री गावाशेजारील डोंगरातील दरीत चिमुकलीचा मृतदेह आढळून आल्यानंतर हा धक्कादायक प्रकार उघडकीस आला आहे. संतोष चंद्रू थोरात रा. ढेबावाडी ता. पाटण असे अटक केलेल्या नराधम आरोपीचे नाव आहे.  पीडित मुलगी देखील गावातील रहिवासी असून ती इयत्ता दुसरीच्या वर्गात शिकत होती. पीडित मुलगी खेळायला बाहेर गेली असता बराच वेळ होऊनही ती घरी परतली नसल्याचे आजीच्या लक्षात आल्यामुळे पीडित मुलीच्या आजीने आणि तिच्या घरच्यांनी तिची सर्वत्र शोधाशोध केली. पण तिचा काहीही थांगपत्ता लागला नाही.

याप्रकरणी पोलिसांनी आरोपीला अटक केली आहे. पोलिसांनी आरोपीकडे चौकशी केली असता, त्याने गुन्ह्याची कबुली दिली आहे म्हणून सदर आरोपीस फाशीची शिक्षा देण्यात यावी अन्यथा परिवर्तन स्वाभिमानी संघटनेच्या वतीने तिव्र आंदोलन छेडण्यात येईल अशी मागणी परिवर्तन स्वाभिमानी संघटना महाराष्ट्र प्रदेश अध्यक्ष उमेश सुरेशराव इंगळे यांनी महाराष्ट्र राज्य गृहमंत्री दिलीप वळसे-पाटील यांना पाठवलेले पत्राद्वारे केली आहे