वाघाचा मृत्यु अपघात की घातपात !

वाघाचा मृत्यु अपघात की घातपात !  चर्चेला उधाण

वणी:   वणी तालुक्यातील सोनेगाव गावाजवळील नामदेव (होमदेव) लोहकरे यांचे शेताजवळ नाल्यात एक मोठा पट्टेदार वाघाच्या गळ्याला तारेचा फास लागून असलेल्या मृतावस्थेत पडुन असल्याचे आढळून आला आहे. हि घटना आज दि. २३ मार्च रोजी दुपारी १२ वाजताच्या दरम्यान उघडकीस आली असुन या घटनेची माहिती दिलीप काकडे माजी जिल्हा परिषद सदस्य घोंसा यांनी वनखात्याला दिली आहे. या माहिती वरुन मारेगाव वनखात्याचे वनपरीक्षेत्राधिकारी विक्रांत खाडे घटनास्थळी दाखल झाले होते.
विशेष म्हणजे तीन दिवसांआधी सोनेगाव येथील तोडासे यांचे शेतातील गोठ्यातील सात शेळ्या ह्याच वाघाने मारल्या होत्या तर  वाढोना बंदी येथे सहा दिवसांपूर्वी ह्याच वाघाने हल्ला करून तिघांना जखमी केले होते असे बोलले जात असुन मात्र राष्ट्रीय संपत्ती असलेल्या वन्यप्राण्याची मोठी हानी झाली आहे.