राजूर ग्रा.पं.च्या मासिक सभेला सदस्यांची दांडी

कोरम अभावी मासिक सभा रद्द

राजूर कॉलरी : तालुक्यातील मोठी ग्रापं व औद्योगिक क्षेत्र असलेल्या राजूर ग्रापं मध्ये मात्र हवसेनवसे ग्रापं सदस्यांमुळे गावातील विकास कामांना खीळ बसत असल्याचे चित्र दिसत आहे. दर महिन्याला होणाऱ्या ग्रापं च्या मासिक सभेला फार महत्व असते. गावातील विकासकामा संदर्भात अनेक ठराव घेऊन गावाचा विकास करायचा असतो. मात्र या मासिक सभेत निवडून आलेले ग्रापं सदस्यच गैरहजर राहून दांडी मारत असतील तर गावाचा विकास कसा होणार, हा प्रश्न निर्माण होतो आहे. 

दहा हजाराचे वर लोकसंख्या असलेली व १७ सदस्यीय असलेल्या राजूर ग्रापं ला दरवर्षी कोटी रुपयांचा निधी येत असतो. त्यातल्या त्यात तीन हजारापेक्षा जास्त घरे व चुना भट्ट्या व कोळसा खान  असल्याने मोठ्या प्रमाणावर कर सुद्धा जमा होत असतो. त्यामुळे राजूर ग्रापं ही कोटी रुपयांचे उलाढाल करणारी ग्रापं आहे. असे असतानाही गावातील विकास कामे व्हायला पाहिजे त्या अनुरूप होत नसल्याने खेडे गावातील विकास कामासमोर राजूर ची अवस्था लाजिरवाणी दिसते. अजूनही गावात रस्ते, नाल्या, प्रदूषण, नाल्या साफसफाई, पथदिवे, नळयोजनेची तारांबळ, कचरा विल्हेवाट, आदी समस्या आ वासून उभ्या ठाकल्या आहेत. 

अशी गावाच्या विकासाची बिकट परिस्थिती असताना मात्र ग्रापं सदस्य दर महिन्याला विकासाची योजना करून विकासाला पुढे नेण्या ऐवजी होणाऱ्या मासिक सभेलाच दांडी मारत असल्याने मासिक सभाच तहकूब करावी लागत आहे. उपस्थित असणाऱ्या ग्रापं सदस्यांना खाली हातांनी परत जावे लागत आहे. १७ सदस्यांमधून ९ सदस्य असल्याखेरीज कोरम पूर्ण होत नसल्याने ग्रामसेवकासमोर मासिक सभा तहकूब करण्याशिवाय गत्यंतर उरत नाही. या ठिकाणी असेही पाहायला मिळत आहे की, काही सदस्य निव्वळ बुकावर सही मारून निघून जातात, त्यांना ग्रामविकासाशी व घेण्यात येणाऱ्या ठरावाशी आणि होत असलेल्या चर्चेशी काहीच देने घेणे नाही. 

हा प्रकार पूर्णपणे येथील विकासाला खीळ घालण्याचा आहे. मासिक सभेला ग्रापं सदस्यांची उपस्थिती नसणे ह्याला सत्ताधारी व विरोधक दोन्ही सारखेच जवाबदार आहेत. दोन्ही बाजूचे सदस्य गैरहजर असतात. ज्यांना गावाचा विकासाशी काहीही देणेघेणे नाही असे हवसेनवसे लोकप्रतिनिधी बनत असतील तर विकासाची गंगा वाहणारच कशी? हा प्रश्न जनतेमध्ये निर्माण होणे गरजेचे आहे.