जिल्ह्यात थंडीची लाट, पारा १५ अंशांवर

अंशतः ढगाळ वातावरण तरी थंडी कायमं दोन दिवसांत आणखी वाढणार

प्रविण गायकवाड (प्रतिनिधी): दिवाळी आटोपली तसा थंडीचाही जिल्ह्यात जोर वाढला आहे. शहरात गेल्या २४ तासांत १५ अंश सेल्सिअस किमान तापमानाची नोंद झाली तर ग्रामीण भागात पारा १२ अंशांपर्यंत खाली गेला. त्यामुळे गावांमध्ये ठिकठिकाणी शेकोट्या पेटवून नागरिक, ऊब मिळविण्याचा प्रयत्न करीत असल्याचे दृश्य दिसून आले. येत्या दोन दिवसांत थंडी वाढणार असल्याचा अंदाज श्री शिवाजी कृषी हवामान केंद्राने व्यक्त केला आहे.

गेल्या दोन दिवसांत शहरातही १२ व १२.५ अंश सेल्सिअस किमान तापमानाची नोंद झाली. बुधवारी सकाळपासून अंशतः ढगाळ वातावरण राहिले तरीही थंडीचा जोर कायम राहिला. त्यामुळे स्वेटर, मफलर, जर्कीन, हातमोजे,कानटोप्या असे ऊब देणारे कपडे घालून नागरिक ऊब मिळविण्याचा प्रयत्न करीत वाहनांवरून ये-जा करीत होते.

बुधवारी मध्यवर्ती बंगालच्या उपसागरात कमी दाबाचे क्षेत्र निर्माण झाले आहे. रात्रीपर्यंत त्याचे हलक्या वादळात रुपांतर होणार असले तरी ते वायव्य दिशेला प्रवास करण्याची जास्त शक्यता आहे. त्यामुळे तामिळनाडू व आंध्र प्रदेशच्या किनारपट्टीवर त्याचा आंशिक प्रभाव पडेल. मात्र भूभागावर पोहोचल्यावर याची शक्ती कमी होण्याची शक्यता आहे. १० ते १२ नोव्हे. या कालावधीत वातावरण कोरडे राहील. १३ व १४ रोजी विदर्भात अमरावती वगळता इतरत्र हलक्या पावसाची शक्यता आहे. त्यानंतर थंडी आणखी वाढेल. कारण उत्तरेकडून येणाऱ्या वाऱ्याची दिशा ही अमरावतीच्या बाजूने राहण्याची शक्यता असल्याची माहिती श्री शिवाजी कृषी हवामान केंद्राच्या प्रा. अनिल बंड यांनी दिली.