दुःखित कुटूंबाचे  सांत्वन करता येईल असे शब्दनाही मुख्यमंत्री उद्धव ठाकरे

जीव गमावलेल्या चिमुकल्यांच्या कुटुंबीयांशी चर्चा

भारतीय वार्ता:   येथील जिल्हा सामान्य रुग्णालय आग प्रकरणानंतर आज मुख्यमंत्री उद्धव ठाकरे यांनी दुर्घटनाग्रस्त रुग्णालयाला भेट दिली तसेच या दुर्घटनेत जीव गमावलेल्या चिमुकल्यांच्या कुटुंबांचीही भेट घेतली. यावेळी त्यांनी भावनिक प्रतिक्रिया दिली. मी आता या कुटुंबीयांना भेटलो, यावेळी हात जोडून उभे राहण्याखेरीज माझ्याकडे कोणतेही शब्द नव्हते. कुटुंबीयांचे सांत्वन करता येईल असे शब्द निदान माझ्याकडे तरी नाही, अशा शब्दात मुख्यमंत्र्यांनी दुर्घटनेवर आपली प्रतिक्रिया दिली.
मुख्यमंत्री उद्धव ठाकरे यांनी आज दुर्घटनाग्रस्त रुग्णालयाची पाहणी केली तसेच या आगीत प्राण गमावलेल्या चिमुकलीचे पालक बेहरे यांची भेटही घेतली. या पालकांची भेट घेतल्यानंतर मुख्यमंत्र्यांनी प्रसारमाध्यमांशी संवाद साधला. ही दुर्घटना आम्ही अत्यंत गंभीरपणे घेतली आहे. या दुर्घटनेची चौकशी करण्यात येणार आहे. त्यासाठी आम्ही समितीची स्थापना केली आहे. मुंबई अग्निशमन दलाचे निवृत्त अधिकारी प्रभात रहांगदळे या चौकशी समितीत असतील. ही दुर्घटना कशी घडली हे शोधल्याशिवाय आम्ही राहणार नाही, असे आश्‍वासन मुख्यमंत्र्यांनी दिले. दुर्घटनेस जबाबदार असलेल्या कुणाचीही गय केली जाणार नाही, असेही त्यांनी पुन्हा सांगितले.