ना. सुधीरभाऊ मुनगंटीवार सेवा केंद्रातर्फे दिव्यांग विद्यार्थ्याला शैक्षणिक मदत

ना. सुधीरभाऊ मुनगंटीवार सेवा केंद्र दिव्यांग बांधवांच्या मदतीसाठी सदैव तत्पर- विवेक बोढे

घुग्घुस येथील ना. सुधीरभाऊ मुनगंटीवार सेवा केंद्रातर्फे गुरुवार, ३१ ऑगस्ट रोजी मुकबधिर विद्यार्थ्याला शैक्षणिक मदत करण्यात आली.

साई अमर नागपूरे (वय वर्षे १० रा. गांधी चौक, घुग्घुस) हा जन्मापासून मुकबधिर आहे.  त्याचे आई वडील मोलमजुरीचे काम करून आपल्या कुटुंबाचा उदरनिर्वाह करतात.

नागपुरे कुटुंबियांनी ना. सुधीरभाऊ मुनगंटीवार केंद्रात येऊन भाजयुमो प्रदेश उपाध्यक्ष विवेक बोढे यांची भेट घेतली व आपली व्यथा सांगितली. माजी भाजपा जिल्हाध्यक्ष देवराव भोंगळे यांच्या माध्यमातून भाजयुमो प्रदेश उपाध्यक्ष विवेक बोढे यांनी साई नागपुरे या मुकबधिर विद्यार्थ्याचा आनंदवन येथे प्रवेश करून दिला तसेच शैक्षणिक साहित्याची किट भेट दिली.

मनोगत व्यक्त करतांना भाजयुमो प्रदेश उपाध्यक्ष विवेक बोढे म्हणाले, गोर गरिबांची सेवा हिच ईश्वर सेवा हा मुलमंत्र घेऊन आम्ही समाज सेवेचे कार्य करीत आहोत. दिव्यांग विद्यार्थ्यांच्या सेवेसाठी ना. सुधीरभाऊ मुनगंटीवार सेवा केंद्र सदैव तत्पर आहे. दिव्यांग विद्यार्थ्यांना मदतीची आवश्यकता असल्यास त्यांनी ना. सुधीरभाऊ मुनगंटीवार सेवा केंद्राशी संपर्क साधावा.

याप्रसंगी साई नागपुरे यांच्या आईचे अश्रू अनावर झाले, त्यांनी पालकमंत्री सुधीर मुनगंटीवार, माजी भाजपा जिल्हाध्यक्ष देवराव भोंगळे, भाजयुमो प्रदेश उपाध्यक्ष विवेक बोढे व ना. सुधीरभाऊ मुनगंटीवार सेवा केंद्राचे आभार व्यक्त केले.

यावेळी भाजपा नेते संजय तिवारी, सुधाकर आसुटकर, सुनंदा लिहीतकर, सचिन राजूरकर, दिवाकर क्षीरसागर, शीतल कामतवार, स्वाती गंगाधरे, खुशबू मेश्राम व नागरिक उपस्थित होते.