घुग्घुस शहरात जागतिक स्तनपान सप्ताह दिनानिमित्त प्राथमिक आरोग्य केंद्राच्या वतीनं गरोदर मातांना मार्गदर्शन

घुग्घुस : 

दरवर्षी १ ऑगस्ट ते ७ ऑगस्ट दरम्यान 'जागतिक स्तनपान सप्ताह' म्हणजेच वर्ल्ड ब्रेस्टफीडिंग वीक साजरा केला जातो. हा विशेष सप्ताह लोकांना स्तनपानाचे फायदे आणि गरजेबद्दल जागरूक करण्यासाठी साजरा केला जातो. या वार्षिक महोत्सवात भारतासह १२० पेक्षा अधिक देश सहभागी होत आहेत. अशातच घुग्घुस शहरात जागतिक स्तनपान सप्ताह दिनानिमित्त प्राथमिक आरोग्य केंद्राच्या वतीनं गरोदर मातांना मार्गदर्शन करण्यात आले. यावेळी प्राथमिक आरोग्य केंद्रचे वैद्यकीय अधिकारी डॉ पडगिलवार, आरोग्य सेवक जुनारकर, आरोग्य सेविका रामटेके यांच्या सह अनेकांची उपस्थिती होती.

आठवडाभर चालणारा हा कार्यक्रम आई आणि मूल दोघांसाठीही खूप महत्त्वाचा आहे. बाळासाठी आणि आईसाठी स्तनपान किती महत्त्वाचे आहे याविषयी संपूर्ण जगामध्ये जनजागृती करणे हा या कार्यक्रमाचा मुख्य उद्देश आहे. या कार्यक्रमात, बाळाच्या सर्वांगीण वाढीसाठी स्तनपान किती महत्त्वाचे आहे हे सांगितले जाते. जागतिक आरोग्य संघटनेच्या म्हणण्यानुसार दरवर्षी २७ लाख मुले कुपोषणाला बळी पडतात. आईचे दूध बाळासाठी खूप महत्वाचे आहे कारण ते त्याच्या निरोगी वाढीस मदत करते. अनेकदा डॉक्टरांपासून ते आरोग्य तज्ज्ञांपर्यंत ६ महिने बाळाला फक्त आईचे दूध द्यावे, असे सांगितले जाते.

घुग्घुस शहरात सुद्धा प्रत्येक अंगणवाडी केंद्रात प्राथमिक आरोग्य केंद्रात महिलांना माहिती देण्यात आली.यावेळी डॉक्टरांनी व आरोग्य सेवकांनी गरोदर महिलांना मोलाचे मार्गदर्शन केले.