प्रदूषणामुळे घुग्गुस शहरातील नागरिक विविध आजारांच्या विळख्यात, प्रा.आ. केंद्राने आकडेवारी केली जाहीर

घुग्घुस 

महाराष्ट्रातील अतिप्रदूषित शहर म्हणून ओळख असलेल्या घुग्गुस शहरातील नागरिक प्रदूषणामुळे विविध आजारांच्या विळख्यात सापडले असून अनेकांना आपला जीव गमवावा लागला आहे.तशी आकडेवारी प्राथमिक आरोग्य केंद्र विभागाने जाहीर केली असून डॉ निलेश पडगीलवार यांनी माहिती दिली आहे.घुग्गुस प्राथमिक आरोग्य केंद्राला लागूनच लोयड्स मेटल्स कंपनी असून कंपनीच्या प्रदूषणामुळे व ट्रक पार्किंग सुद्धा लागून असल्यानं त्यामुळे सुद्धा प्रदूषणात प्रचंड वाढ झाली आहे.

घुग्गुस शहर हे औद्योगिक क्षेत्र असून एसीसी सिमेंट, लोयड्स मेटल्स, कोळसा खाणी आहेत.याच कंपन्यांमधून मोठ्या प्रमाणात धूर निघत असून जड वाहतुकीमुळे सुद्धा हवेतील प्रदूषणात वाढ झाली.त्यामुळं घुग्गुस शहरातील नागरिकांना दमा, अस्थमा, त्वचा रोग, डोळ्यांचे आजार होत आहे.

आजघडीला शहरात दम्याचे रुग्ण 30, युआराय 448, ब्रोकयसिस 40, टीबी 7, त्वचा रोगाचे 350, तर डोळ्यांच्या आजाराचे 250 रुग्ण आहेत. या सर्व रुग्णांवर नियमित उपचार सुरू असल्याची माहिती डॉ निलेश पडगीलवार यांनी दिली आहे. दरम्यान प्रदूषणावर आळा घालण्यासाठी ठोस उपाययोजना करण्यात यावी अशी मागणी सुद्धा करण्यात आली आहे.